"Qəbələ" sabah Azərbaycan Kubokunun final matçında "Neftçi" ilə üz-üzə gələcək.
prosport.z xəbər verir ki, oyundan əvvəl təşkil olunan mətbuat konfransında "qırmızı qaralar"ın baş məşqçisi Elmar Baxşıyev jurnalistlərin suallarını cavablandırıb:
– Oyunun əhəmiyyətini bilirik. Komanda şəklində çalışacağıq ki, yaxşı mübarizə aparıb, istəyimizə çataq. Şanslar bərabərdir. Finalda favorit olmur. Düşünürəm ki, komandam məqsədə çatmaq üçün hər şeyin ən yaxşısını edəcək.
– Kubokun finalında meydan sahibi amili olmasa da, faktiki olaraq "Bakcell Arena" "Neftçi"nin stadionudur. Meydan sahibi və azarkeş amili sizə problem yaratmayacaq?
– Təsir etməməlidir. İlk dəfə deyil ki, burada oynayırıq. Biz də"Bakcell Arena"ya alışmışıq. Stadionun atmosferi futbolçuların oyundan həzz almasına münasibdir. Düşünmürəm ki, bizə təsiri olacaq.
– "Qəbələ" avrokuboklara vəsiqə qazanıb, "Neftçi"də isə titul qazanmaq üçün gərginlik var. Bu sizin xeyrinizədir?
– "Neftçi"nin necə olacağını düşünmürük. Məni daha çox düşündürən öz komandamdır. Çempionatda istədiyimiz yerə gəlib çatdıq. Futbolçulara təşəkkür edirəm. Oyunçularım hər şeyi edəcəklər ki, titula sahib çıxsınlar. İddialıdırlar. Sabah fərqli "Qəbələ" görəcəyik.
– Sabahkı oyunda cəzalı olan Asif Məmmədovla yeni müqavilə bağlanılacaq?
– Əlbəttə. Asif oyunda zədə alıb, klub olaraq ən yaxşısını etməyə borcluyuq ki, karyerasını davam etdirsin.
– Özünüzü evdə hiss etməyiniz üçün "Qəbələ" azarkeşlərini stadiona necə səsləyərdiniz?
– İstəyərdik ki, azarkeşlərimiz sabah stadionda olsunlar. Onların dəstəkləri bizə əlavə güc verir. İnanıram ki, çoxlu sayda azarkeşimiz stadionda olacaq. Futbol statistika üzərində qurulmayıb. Oyunlar fərqli olur. Keçmişdə olanlar keçmişdə qalıb. Düşünürük ki, tarix yaza bilərik. Futbolçularıma inanıram. İnanıram ki, məqsədə çatmağa cəhd edəcəyik.
– Bəziləri bu oyunu Elmar Baxşıyev – Laurentsiu Reqekampf dueli kimi də görür...
– Bəziləri hər cür fikirləşə bilər. Sabah "Neftçi" və "Qəəblə" oynayacaq. Məşqçilərin yox, komandaların dueli olacaq.
– Heyətlə bağlı probleminiz var?
– Asif Məmmədovdan başqa, zədəli Fares Abu Akeldir. Əməliyyat olunmalıdır. İki futbolçu xaric, bütün komanda sabahkı oyunda iştirak edə biləcək.
– Reqekampf da şansları 50/50-ə dəyərləndirdi. Amma kağız üzərində və büdcəsinə görə "Neftçi" daha çox favorit görünür. Azərbaycanlı və legioner məşqçilərin üz-üzə gəlməsi baxımından önəmli matçdır?
– Premyer Liqada da bizə inanan az idi. Amma şükürlər olsun ki, az büdcə ilə məqsədimizə çatdıq. Sabah finaldır. Büdcə heç cür önəm daşımır. Hansı komanda xarakter göstərsə, istəyinə çatacaq.
– Əksər komandalar futbolçularla yollarını ayırır. Transfer üçün daxili bazara baxacaqsınız?
– Transfer çalışmalarımıza başlamamışıq. Daha çox sabahkı oyunu düşünürük. Bu matçdan sonra hansı mövqelər önəmli olacaqsa, transferlərimizi o yöndə edəcəyik.