Bu gün Tailandın Mın Patum Tani bölgəsində 3x3 basketbol üzrə beynəlxalq turnirin həlledici mərhələsi baş tutub.

Prosport.Az xəbər verir ki, "Paris 2024" Olimpiadasının təsnifat oyunlarına hazırlıq məqsədi daşıyan beynəlxalq turnirdə 3x3 qadın millimiz B qrupundan çıxaraq, turnirin 1/4 final mərhələsinə yüksəlib.

Millimiz bu mərhələdə "Sriraça İql" (Tailand) klubuna 21:11 hesabı ilə qalib gəlib və adını yarımfinala yazdırıb. Yığmamız yarımfinalda Polşanın "Lotto" klubu üzərində 17:16 hesablı qələbəyə sevinib. Finalda güclü ZOOS (Almaniya) klubuna qarşı gərgin oyunun yekununda 15:17 hesabı ilə məğlub olan 3x3 qadın millimiz beynəlxalq turniri 2-ci sırada tamamlayıb.

Qeyd edək ki, komandamız qrupda "Lotto"ya (Polşa) 13:21 və "Tayqer"ə (Tailand) 17:21 uduzsa da, "Udon Volvz"a (Tailand) 21:9 və "Urateks Drim"ə (Filippin) 21:17 qalib gələrək qrupdan çıxmağı bacarıb.