"Çətin oyun olacağını bilirdik. Çünki rəqib komandanın müsbət dinamika ilə davam edən qrafiki var idi. Yaxşı, baxımlı basketbol oynayırlar. Eyni zamanda onlar üçün çox vacib görüş idi. Qazanmaları lazım idi. Buna görə çox gərgin mübarizə şəraitində keçən oyun oldu".

Prosport.Az xəbər verir ki, bu sözləri "Xırdalan"ın baş məşqçisi Uğur Özdəmir Azərbaycan Basketbol Liqasının XVI turunda "Sərhədçi"yə 112:105 hesabı ilə qalib gəldikləri oyundan sonra klubun mətbuat xidmətinə açıqlamasında deyib. 

Türkiyəli mütəxəssis qələbə qazandıqlarına görə şad olduğunu bildirib: "Yaxşı baş məşqçiyə və oyunçulara sahib komandaya qarşı oynadıq. Detallara toxunsaq, görüşün ilk 2 periodunda rəqibin 63 xal qazanması bizim birəbir müdafiə anlamında səhvlərimizdən qaynaqlanırdı. Bunu fasilədən sonra minimuma endirməyə çalışdıq. Eyni zamanda hücumda da yaxşı oynadığımızı düşünürəm. Rotasiya baxımından sıxıntı yaşadığımız dönəmdə Haslemin bərpa olub bu matçda özünü əla tərəfdən göstərməsi, Arçinin əla oyun nümayiş etdirməsi məni gələcək matçlar öncəsi sevindirir".

O, pley-off öncəsi zədəli olan komandanın əsas üzvü Cessi Cinin durumuna da aydınlıq gətirib: "Qasıq nahiyəsindən ağır zədəsi var. Pley-offa hazır ola bilər. Bərpa dönəmini nəzarətdə saxlayırıq. Qarşıda bizi gözləyən 2 oyuna gəldikdə, o görüşlərdə də sırf qələbə ruhunu qorumaq baxımından qalib gəlməyə çalışacağıq".