"Nicat Abasov futbol oynamağı çox sevir, yaxşı da oynayır. Onun hazırlıq proqramına fiziki məşqlər də daxil idi. Fitnes, üzgüçülük zalına sekundantı Şəhriyar Məmmədyarovla birgə gedirdi. Təxminən 1 aydan çox müddətdə futbol oynayarkən dizindən zədə alıb. Onun menisk nahiyəsi qırılıb". 

Bunu Prosport.Az-a Azərbaycan Şahmat Federasiyasının prezidenti Mahir Məmmədov deyib.

Dünya şahmat tacına Namizədlər Turnirində iştirak edəcək Nicat Abasov yarışa zədəli formada qatılıb. Onun FIDE-yə müsahibə verərkən dizinin zədəli olması diqqətdən qaçmayıb.

FIDE-nin (Beynəlxalq Şahmat Federasiyası) vitse-prezidenti də olan Mahir Məmmədov artıq onun zədəsinin sağaldığını bildirib: "Ayağı gipsdə qalmışdı. İndi artıq düzəlib. Qaça bilməsə də, gəzə bilir. Ümid edirik ki, bunun onun oyununa təsiri olmayacaq. Əksinə, düşünürəm ki, çox gəzməyəcək və oyunlara daha yaxşı köklənib məhsuldar işləyəcək".

Qeyd edək ki, Kanadanın Toronto şəhərində keçiriləcək Namizədlər Turnirinə bu gün start veriləcək. Yarış yerli vaxtla saat 14:30-da (Bakı vaxtı ilə saat 22:30) başlayacaq.

Xatırladaq ki, Bakıda keçirilmiş Dünya Kubokunun 4-cüsü olmuş Nicat Abasov bu yarışda norveçli dünya çempionu Maqnus Karlsenin iştirak etməməsi səbəbindən turnirdə mübarizə aparmaq hüququ əldə edib. Nicat Namizədlər Turnirində reytinqdə "100-lük"dən kənarda olan (2632 xalla 110-cudur) yeganə şahmatçıdır. Onun ilk turdakı rəqibi FIDE reytinqində 7-ci pillədə qərarlaşmış rusiyalı Yan Nepomnyaşşi olacaq.

Səbuhi Musa