"Neftçi" basketbol üzrə Azərbaycan Kubokunun A qrupunun son turunda "Xəzri"yə 80:67 hesabı ilə qalib gəlib.

Prosport.Az xəbər verir ki, hər iki komandanın baş məşqçisi qarşılaşma ilə bağlı fikirlərini bölüşüb.

Anar Sarıyev ("Neftçi"): "Uşaqları təbrik edirəm! Yaxşı oynadıq və layiqli qələbə qazandıq. Bizim üçün yarımfinal qabağı yaxşı motivasiya oldu. Qrup mərhələsini məğlubiyyətsiz  tamamladıq və lider kimi başa vurduq. İnanıram ki, yarımfinalda daha yaxşı motivasiya ilə oyuna çıxacağıq və qələbələrimizi davam etdirəcəyik".

Murat Dikmən (“Xəzri”): "9 matçdan sonra məğlubiyyətlə tanış olduq. Bu matç qrup liderliyi üçün çox vacib idi. Vaxtından əvvəl yarımfinala vəsiqəni təmin etmişdik. Ona görə də bu görüşə çox köklənə bilmədik. Rəqibimizi təbrik edirəm. Qalibiyyət onların haqqı idi. Amil Həmzəyev və Yusuf Muhammedin zədəli olması bizə uzun oyunçu rotasiyasında çətin anlar yaşatdı. Oyun içərisində istədiyimiz ritmi yaxalaya bilmədik. Buradan çıxaracağımız bəzi dərslər var. Qarşıda bizi çempionatda “Sumqayıt”la oyun gözləyir. Orada da qaldığımız yerdən davam etmək istəyirik. Daha sonra isə kubokun yarımfinalında rəqibimiz kim olacaqsa, onları da məğlub edərək finala çıxmaq istəyirik.