Basketbol üzrə Azərbaycan Kubokunun A qrupunun son turunda “Xırdalan” “Sumqayıt”ı 89:83 hesabı ilə məğlub edib.
Prosport.Az xəbər verir ki, hər iki komandanın baş məşqçisi qarşılaşma ilə bağlı fikirlərini bölüşüb.
Uğur Özdəmir (“Xırdalan”): “Bizim üçün hər hansı bir qazancın olduğunu düşünmürəm. Əksinə, itirdik deyərdim. Bu gün daha bir əsas oyunçumuz zədələndi. Hətta 2 zədəlimiz var. Bir qardımız, bir də mərkəz basketbolçumuz. Eyni zamanda kubokun reqlamentinə görə oyun ritmimizi itiririk. Amma təbii ki, qrupdan çıxa bilməsək də, "Sumqayıt"la görüşü qazandığımıza görə sevinirik. Qarşıdakı müntəzəm çempionat oyunlarına köklənməliyik. Biz əlimizdən gələnin ən yaxşısını etməyə çalışacağıq. Hər oyun bizim üçün çox dəyərlidir. Amma onu da qeyd edim ki, hazırda oyunçularım özlərini məhz pley-offa kökləyirlər. Artıq o mərhələni düşünürlər. Buna baxmayaraq, bütün fikirlər gələn həftə oynayacağımız "Sərhədçi" ilə görüşdədir”.
Teymur Hüseynov (“Sumqayıt”): "Bərabərsəviyyəli oyun izlədik. Sadəcə, biz yenə də səhvlərdən əziyyət çəkdik. Belə baxanda oyunçularımdan razıyam. Amma bu qədər səhvlər yersizdir. Oyunun sonlarında dəqiq "üçlük" ata bilmədik və nəticədə səhvlər sıralandı. Həm də bu gün zədə səbəbindən əsas snayperimiz Lenard Diksonun xidmətindən yararlana bilmədik. Kamran İmanovun da səhhətində problemlər var idi. İlk hissədə Roderik Smitin də oyunu alınmadı. İki nəfər qarşısını kəsəndə ötürmə etməlidir, o da atışlara üstünlük verdiyinə görə belə alındı. Artıq bütün diqqətimizi “Xəzri” ilə qarşıdakı matça yönəltməliyik. Pley-offa vəsiqə qazanmaq üçün həmin oyunda mütləq qalib gəlməliyik. Sona qədər mübarizə aparacağıq!".