Azərbaycan Basketbol Liqasında (ABL) XV tura start verilib.

Prosport.Az xəbər verir ki, "Sərhədçi" İdman Mərkəzində baş tutmuş turun açılış oyununda, "Neftçi" və "Gəncə" klubları üz-üzə gəlib.

Pley-off zonasında qərarlaşmış "Neftçi" oyuna sürətli başlayaraq, rəqibi üzərində 97:62 hesablı rahat qələbəyə sevinib. Ən məhsuldar basketbolçular "Neftçi"də DiAncelo Styüart (17 xal, 7 ribaund), "Gəncə"də İrşad Hant (19 xal, 11 ribaund) olub.

Oyundan sonra "Neftçi"nin baş məşqçisi Anar Sarıyev klubun mətbuat xidmətinə fikirlərini bölüşüb: "İlk 10 dəqiqəni çox da yaxşı başlamadıq. Ancaq sonra özümüzü toparladıq və öz oyunumuzu göstərə bildik. Nəticədə qələbə qazanan tərəf olduq. Bu gün  komandamdan çox razı qaldım. Həm yerli oyunçularımız, həm də legionerlərimiz çox yaxşı təsir bağışladı. Hiss olunurdu ki, onlar meydana qələbə qazanmaq üçün çıxıb. İndi uşaqlara 2-3 günlük istirahət verdim ki, basketboldan bir az uzaq qalsınlar. Onlara indiyə kimi çox da istirahət verilməmişdi. Ona görə də bir qədər istirahət etmələrinə ehtiyac var. Bundan sonra isə yenidən  məşqlərə davam edəcəyik və "Xəzri"  ilə kubok oyununa hazırlaşacağıq".

Qeyd edək ki, XV turun növbəti oyunları ("Xırdalan" – "Xəzri", "NTD-İndiqo" – "Sərhədçi", "Cəlilabad" – "Sabah", "Şəki" – "Sumqayıt") 15, 16 və 17 mart tarixlərində baş tutacaq.