“Gəncə” basketbol klubu Azərbaycan Kubokunda “NTD-İndiqo”ya 75:98 hesabı ilə məğlub olub. 

Prosport.Az hər iki komandanın baş məşqçisinin fikirlərini təqdim edir:

Bedri Meriç ("Gəncə"): “Əvvəldən də söyləmişdim ki, kubok matçlarını ritm yaxalamaq üçün oynayırıq. Rotasiya etmək imkanı bizdən daha geniş olan rəqibə qarşı çıxış etdik. Bundan sonra fikrimizdə çempionat matçları var. Liqada yaxşı oynayıb qələbə qazanmaq istəyirik. Hədəfimiz heç olmasa, mövsümün sonu üçün azarkeşlərimizə sevinc bəxş etməkdir. Diqqətimiz buna yönəlib”.

Tahir Baxşıyev ("NTD-İndiqo"): "Hücumda çox yaxşı oynadıq. Ancaq müdafiədə daha etibarlı oyun görmək istəyirdim. 17 səhv etdik. Rəqibdən daha çox. Ümumiyyətlə isə mən oyundan razı qaldım. Artıq yarımfinalı təmin etdik. Ancaq dayanmaq fikrimiz yoxdur. Kuboku qazanmaq istəyirik. Çempionat və kuboku müqayisə etsək, hesab edirəm ki, hər iki turnirdə qələbə uğrunda mübarizə apara bilərik. Növbəti oyun artıq liqa çərçivəsində olacaq – "Sərhədçi"yə qarşı. Onların komandası çox dəyişib. Güclü məşqçi gəldi. Amma biz heç vaxt rəqibə uyğun planları qurmuruq. Kubokda 3 qələbədən sonra oyuna yaxşı əhval-ruhiyyə ilə çıxacağıq".