"Xəzri" basketbol üzrə Azərbaycan Kubokunun qrup mərhələsində "Xırdalan"a 75:64 hesabı ilə qalib gələrək yarımfinala vəsiqəni vaxtından əvvəl təmin edib 

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Murat Dikmən ("Xəzri”): "İlk olaraq “Xırdalan” kollektivini təbrik edirəm. Çox yaxşı çıxış etdilər və oyunun sonuna qədər mübarizə apardılar. Bəli, kubokda irəliləyirik. Yarımfinala yüksəldik. “Neftçi” ilə oyundan sonra yarımfinalda hansı komanda ilə oynayacağımız bəlli olacaq. Oranı da ayrıca düşünəcəyik. Finala çıxaraq kuboku qazana bilərik. Liqada liderik, kubokda yarımfinala çıxmışıq, bunların heç biri təsadüf deyil. Hamısını çox və doğru çalışaraq etmişik. Bütün rəhbərliyi, menecerləri, oyunçularımı, köməkçilərimi, azarkeşlərimizi təbrik edirəm. Yarımfinalı onlara hədiyyə edirik. Ümidvaram ki, kuboku qazanıb onlara daha dəyərli hədiyyə verərik".

Uğur Özdəmir ("Xırdalan"ın baş məşqçisi): "Kubok oyunlarında 3 yerli basketbolçu ilə oynadığımıza görə rotasiya imkanlarımız məhduddur. Oyunçularımızın mübarizə aparmasına baxmayaraq, son periodda çox yoruldular. Məhz bu dövrədə problem yaşadıq. Onun xaricində, son perioda qədər bərabər səviyyəli oyun gedirdi, gözəl basketbol nümayiş etdirdik. Lakin son periodda həm biz öz oyunumuzda konsentrasiyanı itirdik, həm də bəzi fərqli məqamlar nəticəyə təsir etdi. Bu fərqli məqamları artıq 2 oyundur ki, yaşayırıq. Kubok estafetini özümüz üçün bitmiş hesab edirik. Çempionat oyunlarına köklənməyə çalışacağıq".