Basketbol üzrə Azərbaycan Kubokunun qrup mərhələsində "Neftçi" "Cəlilabad"a 82:71 hesabı ilə qalib gəlib.
Prosport.Az hər iki komandanın baş məşqçilərinin fikirlərini təqdim edir:
Anar Sarıyev ("Neftçi"): "Ümumi olaraq deyə bilərəm ki, müdafiədə həddindən artıq pis başladıq. Demək olar ki, bütün topları boşa atdıq, dəyib-dəyməməyi isə başqa məsələ. Müdafiədə istədiyimizi ala bilmədik. Sonradan bir qədər oyunu öz xeyrimizə dəyişdik və ona nəzarət etməyə başladıq. III periodda uşaqlar yenə tam istədiyimizi verə bilmədilər və yenidən müdafiədə səhlənkar oynadılar. Artıq neçənci oyundur ki, 3 xallıq toplarımızın böyük hissəsi səbətə düşmür. Yenə də məşqlərdə bunun üzərində işləməliyik ki, problemi həll edək, faizi artıraq. Bu faizlə biz komanda olaraq çempionluq haqqında danışa bilmərik.
Qələbəyə görə komandanı təbrik edirəm! 1 günlük istirahətdən sonra yenidən məşqlərə başlayacağıq. "Gəncə" ilə çempionat oyununa hazırlıqları davam etdirəcəyik".
Şəhriyar Əsgərov ("Cəlilabad"): "Zədələr və itkilər səbəbindən ölkə kubokuna hazırlaşarkən iddialı olmadığımızı öncədən də bilirdik. Bu səbəbdən də kubok matçları bizim üçün bir növ ölkə çempionatının oyunlarına hazırlıq və tramplin kimi idi. Xüsusilə də müdafiədə oyunumuzu yaxşılaşdırmaq və sərtləşdirmək mənasında bəzi dəyişiklikləri və variantları yoxladıq. Məncə, müəyyən mənada düşündüyümüz və fikirləşdiyimiz planları reallaşdıra bildik. Müdafiəni gücləndirə bilmişik. Bugünkü matçın ilk 3 periodunda da buna az-çox nail ola bildik. Bunun sayəsində hətta hesabda bir müddət önə də keçdik. Lakin oyunun sonlarında komandamın fiziki gücü çatmadı deyə, yekunda məğlub olduq. Hazırda ən böyük çatışmazlığımız məhz fiziki hazırlıqla bağlıdır. Artıq bunun üzərində işləməyə başlayacağıq. Qarşılaşmaya təsir edən amillərdən biri də hakimlər oldu. Düzdür, onlar barədə çox danışmaq istəmirəm, lakin Raşon Consonun atışı zamanı səhv qərar verdilər, ardınca isə ehtiyatda oturanlara texniki faul verdi. Ancaq dediyim kimi, məğlubiyyəti onların üzərinə yıxmaq istəmirəm. Daha öncə vurğuladığım kimi, "Neftçi" kimi güclü rəqiblə baş-başa mübarizə apara bilməyimiz gələcəyə nikbin baxmağımıza imkan verir. Çempionatda son 4 matçdan ən azı 2-də qalib gəlməyi hədəfləmişik. Ayın 16-da "Sabah"ı Cəlilabadda qəbul edəcəyik. Azarkeşlərimizi həmin oyuna gəlməyi çağırıram. Məhz onların dəstəyi sayəsində biz məqsədimizə çata və pley-offa düşə bilərik".