FIBA-nın 3x3 basketbolu üzrə Qadın Seriyası yarışının bu il üçün təqvimi və məkanları açıqlanıb.

Prosport.Az-ın xəbərinə görə, 23 apreldə ABŞ-da start götürəcək turnirin mərhələ yarışı bu il də 3 dəfə Azərbaycanda keçiriləcək.

Bu dəfə Astara və Şuşanı Qəbələ və Quba əvəzləyib. Qəbələ turnirin 3-cü mərhələ yarışı olacaq. Quba mərhələsi isə Paris Olimpiadasınadək son yarış kimi tarixə düşəcək. Bakıda keçiriləcək yarış isə finala düşmək üçün həlledici mərhələlərdən biri olacaq. 

Mükafat fondu 1,4 milyon dollardan çox olan yarışın 20 mərhələsinin vaxtı, 19-nun təşkilatçı şəhəri müəyyənləşdirilib. Yalnız sentyabrda keçiriləcək final mərhələsinin hansı ölkədə təşkil olunacağı hələ ki bəlli deyil.

Sprinqfild (ABŞ) – 23-24 aprel
Marsel (Fransa) – 29-30 may
Qəbələ (Azərbaycan) – 2-3 iyun
Ulan-Bator (Monqolustan) – 6-7 iyun
Klermon-Feron (Fransa) – 14-15 iyun
Orlean (Fransa) – 20-21 iyun
Çendu (Çin) – 21-22 iyun
Puatye (Fransa) – 25-26 iyun
Kvebek (Kanada) – 29-30 iyun
Uhan (Çin) – 29-30 iyun
Fribur (İsveçrə) – 4-5 iyul
Edmonton (Kanada) – 5-6 iyul
Bordo (Fransa) – 9-10 iyul
Baodin (Çin) – 12-13 iyul
Priştina (Kosovo) – 18-19 iyul
Quba (Azərbaycan) – 20-21 iyul
Saskatun (Kanada) – 17-18 avqust
Bakı (Azərbaycan) – 17-18 avqust
Debretsen (Macarıstan) – 24-25 avqust

Xatırladaq ki, ötən il bu yarışda ölkəmizi Azərbaycan millisi və "Neftçi" komandası təmsil edib. 20-21 mayda Astarada keçirilmiş yarışda Çin, 12-13 iyunda Şuşada baş tutmuş yarışda "Neftçi" və 22-23 avqustda Bakıda təşkil olunmuş yarışda "Düsseldorf ZOOS" (Almaniya) komandası çempion olub.

Qeyd edək ki, 5-ci dəfə təşkil olunan bu turnirin son 2-də Kanadanın qadınlardan ibarət 3x3 basketbol millisi qalib gəlib. 2019-cu ildə Fransa, 2021-ci ildə isə Almaniya millisi çempion olub.