“Çox mübarizəli oyun oldu. İki komandada da yorğunluq var idi. Qısa müddətdə artıq iki oyun keçirmişdik. Bu öz təsirini göstərirdi”.

Prosport.Az xəbər verir ki, bu sözləri “Sərhədçi” basketbol klubunun baş məşqçisi Evren Alkaya deyib. 

Türkiyəli mütəxəssis Azərbaycan Kubokunun qrup mərhələsinin 3-cü oyununda “Şəki”yə 92:81 hesabı ilə qalib gəldikləri matçdan söz açıb: “Çox istirahət edə bilməmişdik. Nəticədə “Şəki” klubu müdafiə seçimini etdi, atışlarla önə keçməyə, dominantlıq etməyə çalışdı. Matçın əvvəlində atışlarımız yaxşı deyildi. Amma bilirdik ki, oyun getdikcə, daha yaxşı olacaq. İkinci hissədən etibarən nəzarəti ələ aldıq. “Şəki” komandası rotasiyalara görə çətinlik yaşadı".

O, turnirə yaxşı hazırlaşdıqlarını söyləyib: "Yarımfinal oynamaq üçün əlimizdən gələni edəcəyik. “Sabah”la oyunu mütləqə qazanmalıyıq. “Sərhədçi” adına yaraşanı etmək üçün çalışacağıq”.