Stend atıcılığı üzrə olimpiya, ikiqat dünya və üçqat Avropa çempionu Zemfira Meftahətdinovaya yeni vəzifə verilir.

Prosport.Az-ın əldə etdiyi məlumata görə, 60 yaşlı mütəxəssis bundan sonra Gənclər və İdman Nazirliyi tərəfindən yaradılan "Azərbaycan İdman Veteranları" İctimai Birliyinin sədri olacaq. 

Onun müavini vəzifəsini isə sabiq atlet (nizə atma) Tamilla Bünyadova icra edəcək.

İdman veteranları məhz Z.Meftahətdinovanın rəhbərliyi altında martın 5-də Quba şəhər stadionunda Bədən Tərbiyəsi və İdman Günü ilə bağlı keçirilən Azərbaycan İdman İctimaiyyəti Paradında iştirak edib.

Qeyd edək ki, Zemfira Meftahətdinova həmçinin 2021-ci ildən Azərbaycan Milli Olimpiya Komitəsinin və Atıcılıq Federasiyasının vitse-prezidentidir.

Onu da bildirək ki, daha əvvəl mərhum gənclər və idman naziri Azad Rəhimovun vaxtında Azərbaycan İdman Veteranları İttifaqı fəaliyyət göstərib. Onun rəhbəri hazırda Qılıncoynatma Federasiyasının prezidenti Balakişi Qasımovun məsləhətçisi vəzifəsini daşıyan Yaşar Məmmədov olub.