Bu gün "NTD-İndiqo" Azərbaycan Kubokunda "Şəki" ilə qarşılaşıb.

Prosport.Az xəbər verir ki, 2 şimal təmsilçisinin Bakıda baş tutan görüşündə Xaçmaz təmsilçisi 40 xal fərqi ilə qalib gəlib – 103:63.

Qarşılaşmadan sonra hər iki komandanın baş məşqçisi fikirlərini bildirib:

Tahir Baxşıyev ("NTD-İndiqo"nun baş məşqçisi): "Matçdan əvvəl hardasa başa düşürdük ki, biz "Şəki"dən daha güclüyük. Ancaq heç bir qələbə asan qazanılmır. Oyuna rahat çıxa bilməzsən. Əks təqdirdə zədə almaq riski böyükdür. Bundan əlavə, basketbolçuları bu cür matçlara motivasiya etmək həmişə çətindir. Ancaq bu mövzuda uşaqlarla danışdıq. Bu gün gənc oyunçulara şans verdik. Məni sevindirdilər. Müdafiədə yaxşı oynadılar. 12 oyunçunun hamısının xal toplaması məni də sevindirdi. Bu tez-tez baş vermir.

Kubok çempionatdan fərqlidir. Tamamilə fərqli yarışdır. Gənc yerli oyunçulara çempionat oyunlarında da şans verməyə çalışırıq. Amma kubokda limit fərqli olduğundan, yerli oyunçular daha çox şans qazanır. "NTD-İndiqo"nun yerli oyunçularının 90%-i bizim yetirməmizdir. Biz həmişə gənc oyunçularla işləyirik. Heyətdə 16 və 17 yaşlı uşaqlar var. Və deməzdim ki, onlar təcrübəli basketbolçulardan zəifdir.

2 cəbhədə oynayırıq. Əgər titul şansımız varsa, onu qazanmaq üçün əlimizdən gələni edəcəyik".

Aleksander Uco ("Şəki"nin baş məşqçisi): "Uduzmağımızın səbəblərini bilmirəm. Biz müdafiədən oynadıq. Qalib gəlmək təcrübəsi uşaqlarda yoxdur. 

Azərbaycan Kubokunda daha çox yerli oyunçu meydana buraxılmalıdır. Fasilə zamanı biz yerli oyunçu komandaya cəlb etməyə çalışdıq. Bizim problemimiz odur ki, yerli və əcnəbi basketbolçular Bakını sevir, Şəkini yox. Onları "Şəki"yə cəlb etmək çətindir.

Oyuna niyə gec gəldim? Komandadan tez hoteldən çıxmışdım. Özümü tanış həkimə göstərməli idim. Ancaq Bakıda tıxaca düşdüm. Burada yaşamadığım üçün belə bir problemlə üzləşəcəyimi gözləmirdim".