Millimizin və "Qarabağ"ın futbolçusu Musa Qurbanlının Prosport.Az saytına müsahibəsi
– Cari mövsümü necə qiymətləndirərdiniz?
– Hər mövsümün öz çətinliyi var. Asan mövsüm olmur. Burada bizim 1 illik əziyyətimiz var. Bizim meydandan kənarda çəkdiyimiz əziyyətlər, məşqlər görünmür. Bütün mövsümlərdə futbolçuların, məşqçilərin, klubun işçilərinin zəhməti var. Ona görə də hər il çempion olanda çox böyük sevinc yaşayırıq. Bu il bizə "Sabah" bir az çətinlik yaratdı. Bu da bizi sevindirir. İstəyərdik ki, "Neftçi", "Zirə", "Qəbələ" və digər klublarımız da çox inkişaf etsinlər, çempionatımız maraqlı olsun. Bu bizə ancaq xeyir verə bilər.
– Bombardir olmadığınıza görə üzülmədiniz?
– Yox. Hər oyun qol vurmaq istəyirəm. Elə matç olmayıb ki, qol vurmaq istəməyim. "Turan Tovuz"la sonuncu oyun da onlardan biri idi. Kim istəməz ki, bombardir olsun? Amma çox məyus olmuram. Şükür Allaha ki, 21 qol vurdum. Bombardir Ramil Şeydayev oldu. O da kənar adam deyil, özümüzünküdür. Onun üçün çox sevindim. Mən əlimdən gələni etdim. Xeyirlisi belə imiş.
– Bu yayda Avropaya gedişiniz baş tuta bilər?
– Hələ ki, bu haqda dəqiq qərar verilməyib. Çempionatın bitməsini gözləyirdik.
– Son qərarı özünüz verəcəksiniz, yoxsa Qurban Qurbanov?
– İkimiz bir yerdə qərar verəcəyik. Nəticədə gedib oynayası olan mənəm. Amma atamın da qərarı olmadan addım atmaram. Əlbəttə ki, onunla məsləhət olunacaq. Çünki atamın həyatda və futbolda təcrübəsi məndən qat-qat çoxdur.
– "Qarabağ"da qalsanız, yeni mövsümdə sizi komandanızın əsas hücumçusu kimi görə bilərik?
– Bunu mən deyə bilmərəm. Mənim işim meydana çıxıb oynamaqdır. Onu zaman göstərəcək.
– Ölkə çempionatında 21 qol vurdunuz, amma avrokuboklarda qolunuz yoxdur. Bu səddi nə vaxt aşacaqsınız?
– Ölkə çempionatında 30-dan çox oyunum var. Avrokuboklarda isə demək olar ki, 2 matçda oynamışam. Oynadıqca düzələr, inşallah.
– "Zalsburq", "Poqon" klubları ilə adınız hallanır. Təkliflər realdır?
– Təklifi kluba göndərirlər, mənim özümə yox. Rəsmi təklif olsa, yəqin ki, xəbərimiz olar. Maraqlananların olması normaldır. Çünki gənc futbolçunun nəticəsi varsa, maraqlanan olur. Mən bunu ümumi məlumat olaraq bilirəm.