Azərbaycan Kubokunda "Xırdalan" "Cəlilabad"ı 108:84 hesabı ilə məğlub edib.
Prosport.Az hər iki komandanın baş məşqçisinin fikirlərini təqdim edir:
Uğur Özdəmir ("Xırdalan"ın baş məşqçisi): "Ölkə kubokuna qələbə ilə başladığımız üçün komandamı təbrik edirəm. Geniş heyətlə bu oyunda çıxış edə bildik. Çox oyunçumuzdan dəstək ala bildim. Ümumi nəzər salsaq, 2 həftə oyun oynamamağımızın ilk dəqiqələrdən təsirini hiss etdik. Lakin sonradan oyuna adaptasiya olmağı bacardıq. Yerli oyunçulardan Fikrət Ələkbərovun 33 xal qazanması və 10 assistlik göstərici ilə çıxış etməsi gözəl statistika idi. Bütün oyunçularıma bundan da gözəl oyun sərgiləmələrini arzu edirəm, xüsusilə müdafiədə. Çünki bu gün müdafiədə yaxşı oynamadığımızı düşünürəm. Bir daha komandamı təbrik edirəm".
Şəhriyar Əsgərov ("Cəlilabad" komandasının baş məşqçisi): "İlk növbədə rəqibi qələbə münasibətilə təbrik edirəm. "Xırdalan" bu vaxta qədər təcrübəsi ilə, göstərdiyi oyunla, qazandığı nəticələrlə sözünü deməyi bacarmış komandadır. Geniş heyətləri və çox yaxşı məşqçiləri var. Bu gün çox istəkli görünürdülər. Düşünürəm ki, kuboku qazanmağa əsas iddialı komandalardan biridir. Bizim komandaya gəldikdə isə... Vəziyyət heç də ürəkaçan deyil. Ciddi itkilərimiz var. Əsas heyətdən 3 oyunçumuz zədəlidir. Seyidhüseyn Eynullayev və Raşon Consonun yoxluğu özünü göstərir. Həmçinin, yığma komandanın heyətində dizindən zədələnən kapitanımız Zaur Paşayevin olmaması da işimizi çox çətinləşdirir. Həmçinin əlavə edim ki, ümumi heyət üzvlərindən Andrey Kondratyev də məhz zədə səbəbindən bu gün bizə kömək edə bilmədi. İtkilər səbəbindən işimizi gənclərə buraxmalı olduq. Lakin nə etmək olar... Hər bir işdə xeyir var. Gənclərimiz də yaxşı təcrübə topladı. Məncə, hesabdaki fərq də məhz bu səbəbdən oldu. İnanın səmimiyyətimə, komandamın potensialı qat-qat daha üstündür. Sadəcə, komandamın bu gün itkilər fonunda motivasiyasız, həvəssiz oynaması məni daha çox məyus etdi. Rəqib də bundan maksimum yararlandı. "Xırdalan"ın heyətində Fikrət Ələkbərov məhsuldarlığı ilə seçildi. Bu da müdafiədə ciddi boşluqlar verməyimizin nəticəsi idi. Növbəti oyunlarda ümid edirəm ki, tam heyətlə istədiyimiz nəticələri qazana biləcəyik. Əsas hədəfimiz çempionatda ilk "6-lığ"ı tutmaq və kubokda maksimum çox irəliləməkdir".
Qeyd edək ki, bu gün turnirdə 16:30-da "NTD-İndiqo" – "Şəki", 19:30-da "Sərhədçi" – "Gəncə" oyunları keçiriləcək. Azərbaycan Kubokunun bütün oyunları "Sərhədçi" İdman Mərkəzində təşkil olunur.