Azərbaycan Şahmat Federasiyasının (AŞF) dəvəti ilə tanınmış Belçika vətəndaşlığı olan rusiyalı mütəxəssis Vladimir Çuçelov Bakıya gəlib.

Prosport.Az xəbər verir ki, səfərdə əsas məqsəd Bakıda gənc şahmatçılar üçün təşkil olunacaq 1 həftəlik təlim-məşq toplanışına rəhbərlik etməkdir.

AŞF ilə V.Çuçelov arasında əldə olunan razılığa əsasən, məşqçi hazırlıqdan sonra hər bir şahmatçı barədə rəy təqdim edəcək. Bundan sonra 54 yaşlı Çuçelovla əməkdaşlığın müddəti dəqiqləşəcək.

Gənclərdən ibarət komandanın üzvləri üçün təşkil edilən toplanışın ilk günündə AŞF-nin prezidenti, FIDE-nin vitse-prezidenti Mahir Məmmədov da iştirak edib. O bundan sonra da şahmatçılara lazımi şəraitin yaradılacağını bildirib.

Qeyd edək ki, 1991-ci ilədək SSRİ-ni, həmin ildən sonra Belçikanı təmsil etməyə başlamış Vladimir Çuçelov uzun illər dünyanın ən reytinqli şahmatçıları ilə işləyib, onların inkişafında yaxından iştirak edib. Müxtəlif illərdə Teymur Rəcəbov, Fabiano Karuana, Aniş Qiri, Vidit Qucrati, Hou İfan kimi tanınan şahmatçıların məşqçisi olub.

Mütəxəssis 2014-cü ildə FIDE tərəfindən ilin ən yaxşı məşqçisi seçilib.