"Qarabağ" göstərdi ki, oyunun gedişində üstünlük rəqibdə olsa belə, qələbə üçün sona kimi mübarizə aparmaq lazımdır".

Prosport.Az xəbər verir ki, bu sözləri "Qarabağ"ın prezidenti Tahir Gözəl UEFA Avropa Liqasının pley-off mərhələsinin cavab matçı çərçivəsində Bakıda Portuqaliyanın "Braqa" klubuna qarşı oyundan sonra jurnalistlərə açıqlamasında deyib.

Onun sözlərinə görə, futbol tarixində bu cür – hər saniyəsi həyəcandan ibarət çox az oyun olub: "Həyatım boyu belə ləzzətli oyun izləməmişdim. İnsanlar futbolun taktika olduğunu deyir. Lakin mən buna qatılmıram. İnsanı uğura aparan onun ruhu, qələbə əzmidir".

Klub rəhbəri bildirib ki, Ağdam təmsilçisi tarixi nəticəyə imza ataraq 1/8 finala vəsiqə qazandı: "Biz 50-60 dəqiqə 10 nəfərlə mübarizə apardıq. "Qarabağ" yorula bilərdi. Deyə bilərdilər ki, bizə çətindir. Amma onlar son dəqiqəyə kimi əllərindən gələni etdi. Bu, bütün xalq üçün ilham oldu. Bundan etibarən hamımız həyata başqa ruhla davam edəcəyik. Mən bu Vətənə, bu xalqa aşiqəm. Prezident İlham Əliyevin, Qurban Qurbanovun, futbolçularımızın, azarkeşlərimizin dəstəyi ilə xalqımıza ən gözəl hədiyyəni "Qarabağ" verdi. Bizim ruhumuz bizim uğurumuzun sirridir. Heç kim bizim qarşımızda dayana bilməz. Mən hiss edirdim ki, bu axşam (dünən – red.) tarixi bir gün olacaq".

Qeyd edək ki, səfərdəki ilk matçda rəqibinə 4:2 hesabı ilə qalib gələn "Qarabağ" 2 görüşün nəticəsinə əsasən tarixində ilk dəfə 1/8 finala vəsiqə əldə edib.