Yeni ilə uğursuz start verən "Araz-Naxçıvan"da təcili iclas keçirilib.

Prosport.Az "sportinfo"ya istinadən xəbər verir ki, klub rəhbərliyi məşqçi və futbolçu heyətini bir araya gətirib.

Yığıncaqda komandanın çıxışı geniş müzakirə olunub, nəticələrdən narazılıq ifadə edilib. Bildirilib ki, maliyyə öhdəlikləri yerinə yetirilsə də, son aylarda göstəricilər inanılmaz dərəcədə pisləşib, ölkə kubokunda qarşıya qoyulan məqsəd yerinə yetirilməyib.

O cümlədən, Premyer Liqanın geridə qalan həftələrində qeydə alınan nəticələr "Araz-Naxçıvab"ı hədəflərindən uzaq salıb. "Kəpəz"ə 1:3 hesablı məğlubiyyət nəticəsində turnir cədvəlində 6-cı pilləyə endikləri vurğulanıb.

Klub rəhbərliyi baş məşqçi Azər Bağırovu tənbeh və tənqid edib. Öncəki fəaliyyəti nəzərə alınaraq, baş məşqçiyə qısamüddətli möhlət verilib.

Gənc mütəxəssisin diqqətinə çatdırılıb ki, Premyer Liqanın qarşıdakı turunda "Neftçi" ilə oyun da daxil olmaqla, ardıcıl 2-3 həftə qələbə qazanılmasa, onunla yollar ayrılacaq.