"Oyun çox maraqlı keçdi. Amma eyni ssenari oldu, dominant "Qarabağ" idi, biz də çalışırdıq ki, 1-ci və 2-ci zonada onları qarşılayaq, əks-hücumlarda oynayaq. "Qarabağ"a qarşı oynamaq üçün 99% azdır, 100% etibarlı çıxış etmək azımdır. Hücumda da, müdafiədə də".

Prosport.Az xəbər verir ki, bu sözləri "Sabah"ın məşqçisi Ruslan Qafitulin Premyer Liqanın XXII turunun "Qarabağ"la oyunundan (3:3) sonra keçirilmiş mətbuat konfransında deyib.

Heç-heçəni şərh edən mütəxəssis daha sonra jurnalistlərin suallarını cavablandırıb:

– Murad Musayevin gedişindən sonra nə dəyişdi ki, "Qarabağ"a uduzmursunuz?
– Daha çox psixoloji cəhətdən futbolçularla danışdıq və onlara sərbətlik verdik. Fərq ondadır ki, bəlkə də Murad Musayevin tələbkar olması uşaqlara təsir edirdi. Amma İqor Ponomaryov onlara azadlıq verdi.

– İqor Ponomaryov bu nəticələrdən sonra komandada qala bilər?
– Mən bu barədə nəsə deyə bilmərəm. Rəhbərliyin işidir.

– Yusif İmanovun son dəqiqədə buraxdığı səhvi necə şərh edərdiniz?
– Öz emosiyaları ilə bacarmadı. Yusif yaxşı qapıçıdır. Bu gün çox yaxşı seyvləri oldu. Sadəcə emosiyaları ilə bacarmadı. Futbolda belə də olur.

– Davit Volkovi oynamır. Onun adı "Zirə" ilə hallanır. Özü getmək istəyir?
– Deyə bilmərəm. Amma bugünkü məlumat odur ki, hərarəti var. 

– Bu gün "Sabah" qələbədən məhrum oldu, yoxsa İmanova görə xal itirdi?
– Deməzdim ki, İmanova görə heç-heçə oynadıq. Siz də izləyirdiniz oyunu. Bizim də hardasa bəxtimiz gətirdi. "Qarabağ"ın epizodları oldu, istifadə edə bilmədi. Heç-heçə yaxşı nəticədir.

– Penaltiləri İshak Belfodil yerinə yetirdi. Bu onu həvəsləndirmək üçün idi?
– Məşqlərdə görürük ki, Belfodil penaltilərə çox soyuqqanlı yaxınlaşır. Baş məşqçi qərar verdi ki, bundan sonra penaltiləri o vuracaq.