"İlk olaraq qələbə münasibəti ilə komandamı təbrik edirəm. Çox yaxşı mübarizə apardılar. Rəqib komanda da eynilə yaxşı oyun sərgilədi".

Prosport.Az-ın məlumatına görə, bunu "Xırdalan" basketbol komandasının baş məşqçisi Uğur Özdəmir deyib.

Azərbaycan Basketbol Liqasının XIV turunda "Xırdalan" sürpriz nəticəyə imza ataraq Xaçmazda "NTD-İndiqo"ya 84:80 hesabı ilə qalib gəlib. Bununla da "Xırdalan" pley-off şanslarını artırıb. Matçdan sonra "Xırdalan"ın türkiyəli məşqçisi qələbə barədə danışıb: 

"Matçı izləyənlər üçün baxımlı oyun alındı. Qələbəmizə toxunsaq, 1 həftədir ki, çox ciddi çalışmalar gedirdi, amma bu sırf bu həftəki məşqlərin deyil, bütün mövsüm boyu durmadan çalışmağımızın və qarşımıza qoyduğumuz hədəflərin nəticəsidir. Addım-addım yaxşılaşdıq. 2-ci dövrə daha yaxşı performans göstərəcəyimizə inanırdıq ki, belə də oldu. Ardıcıl 5-ci qələbəmizi qazandıq. Bundan sonrakı oyunlara da eyni ritmdə hazırlaşıb qələbə qazanmağı hədəfləmişik. Pley-offa ən yüksək sıralardan qatılmaq istəyirik. Bir daha bu gözəl qələbə münasibəti ilə komandamı təbrik edirəm".