"Qəbələ" Azərbaycan Kubokunun 1/4 final mərhələsinin cavab oyununda "Araz-Naxçıvan"ı 2:0 hesabı ilə məğlub edərək yarımfinala yüksəlib.

Prosport.Az xəbər verir ki, "qırmızı-qaralar"ın baş məşqçisi Elmar Baxşıyev qarşılaşmadan sonra keçirilən mətbuat konfransında jurnalistlərin suallarını cavablandırıb:

- Yaxşı mübarizəli oyuna şahidlik etdik. Hər iki komanda meydanda döyüşdü. Sevindirici haldır ki, oyundan qopmadıq. Komanda hər iki hissədə istədiyimiz oyunu göstərməyə çalışırdı. Düşünürəm ki, layiqli qələbə qazandıq. Yolumuza davam edirik. Komandamı təbrik edirəm.

- Bu qələbədən sonra artıq tilsimin qırıldığını demək olar?

- Daha yaxşı olmağa çalışmaq lazımdır. Komanda məşqlərdə bizə bunu nümayiş etdirir. Bilirik ki, bu durumdan çıxmalıyıq. Komandaya inanırıq. Getdikcə nəticə və oyun baxımından daha yaxşı "Qəbələ" görəcəyik.

- Ötən mövsüm Premyer Liqada qalmaq uğrunda mübarizə aparan "Səbail" kubokda yarımfinala çıxmışdı. Həmin vaxt Şahin Diniyev bildirmişdi ki, Premyer Liqada qalmaq üçün kuboku qurban verməyə hazıram. Siz necə düşünürsünüz?

- İndiki halda çətin durumdayıq. Amma nə mən, nə də komanda turnirlərə fərq qoyuruq. Hər iki turnirdə sona kimi vuruşacağıq. Qismətdə nə varsa, o da olacaq.

- Yeni oyunçu transferi gözlənilir?

- Gündəmdə var. Axtarışlarımız davam edir. Düşünürəm ki, transfer mümkündür.

- Legioner limitinin dəyişdirilməsi təklif olunur. Sizin fikriniz necədir?

- Bu məsələyə iki tərəfdən yanaşmaq olar. Limiti tam götürmək də olar. Büdcəsi yaxşı olan klublar legioner limitinin daha çox olmasını istəyərlər. Amma azərbaycanlı oyunçuları, millini də düşünmək məcburiyyətindəyik. İndiki limit münasibdir. Belə davam etmək daha uyğundur.