"Araz-Naxçıvan" Azərbaycan Kubokunun 1/4 final mərhələsinin cavab oyununda səfərdə "Qəbələ"yə 0:2 hesabı ilə məğlub olaraq mübarizəni dayandırıb.

Prosport,Az xəbər verir ki, Naxçıvan təmsilçisinin baş məşqçisi Azər Bağırov matçdan sonra keçirilən mətbuat konfransında jurnalistlərin suallarını cavablandırıb:

- Birinci hissə barədə çox danışmaq istəmirəm. Premyer Liqada və kubokda mübarizə aparırsansa, belə sadə qollar buraxmaq olmaz. Bu, komandada psixoloji gərginlik yaradır. Artıq bir yolumuz var, o da çempionat. Orada yolumuza davam edəcəyik.

- Qış fasiləsində komanda güclənmədi. Bu heyətlə mübarizə aparmaq çətin olmayacaq?

- Müdafiədə elə böyük səhvlərimiz olmur. Əsasən standart vəziyyətlərdən, asmalardan sonra qapımızda qol görürük. Güclənmədik deməzdim. Bəli, transfer edə bilmədik. Amma komanda toparlanacaq. Qarşıdakı matçlarda daha yaxşı oyun gözləyirəm. 3-4 gündən bir oynayırıq, bəzi futbolçularımız qrip virusuna yoluxdular. Çalışacağıq ki, Premyer Liqada daha motivasiyalı, daha yaxşı "Araz-Naxçıvan" görək.

- İki cəbhədə mübarizə aparmaq üçün nə çatmadı?

- Həm heyət yetmədi, həm də sadə toplar buraxmağımız. "Qəbələ" ilə ilk oyunun birinci hissəsində daha yaxşı idik, ikinci hissədə komandanın gücü çatmadı. Bu gün ilk dəqiqələrdən pis başlamadıq, amma çox sadə qollar buraxdıq. İkinci hissədə yaxşı oynadıq, amma qolu vaxtında vura bilmədik. Heyətin geniş deyilsə, iki cəbhədə mübarizə aparmaq çətindir.

- Azarkeşlərinizin olmaması oyununuza təsir edir?

- Əlbəttə, azarkeşin olması yaxşıdır. Naxçıvanda oynasaq, üstünlük bizdə olar. Bunu zaman göstərəcək. Ümid edirəm bu məsələ həll olunar. Biz də istəyərdik ki, öz azarkeşlərimizin əhatəsində oynayaq.

- Transfer ehtimalı var?

- Transfer pəncərəsi bağlanmayıb, gözləyirik. Baxışda olan oyunçu var. Başqa bir şey yoxdur.