Beynəlxalq Basketbol Federasiyasının (FIBA) təşkil etdiyi 3x3 basketbolu üzrə Dünya Qadın Seriyasının IV mərhələsi olan Şuşadakı yarışda hansı komandaların yarışacağı məlum olub.

Prosport.Az-ın xəbərinə görə, II mərhələ olan Astara yarışının qrup mərhələsində qalmış dünya reytinqinin 1 nömrəli komandası Almaniya yenə Azərbaycandakı yarışa favorit qismində qatılacaq. Həmçinin digər iştirakçılar Niderland, Rumıniya, Macarıstan, Türkiyə, "Neftçi" (Azərbaycan), Azərbaycan və "G FLOU.EKZE" (Yaponiya) komandası olacaq.

Qeyd edək ki, yarış 12-13 iyun tarixlərində keçiriləcək.

Onu da bildirək ki, 6-7 mayda Uhanda (Çin) və 20-21 mayda Astarada keçirilmiş yarışlarda dünya reytinqinin 2-cisi olan Çin qalib olub. Şuşadan başqa, 9-10 iyunda Klermon-Feran (Fransa), 16-17 iyunda Sionqan (Çin), 21-22 iyunda Orlean (Fransa), 27-28 iyunda Puatye (Fransa), 3-4 iyulda Netanya (İsrail), 6-7 iyulda Fribur (İsveçrə), 14-15 iyulda Priştina (Kosovo), 19-20 iyulda Bordo (Fransa), 29-30 iyulda Edmonton (Kanada), 4-5 avqustda Praqa (Çexiya), 4-5 avqustda İçan (Çin), 18-19 avqustda Melilya (İspaniya), 18-19 avqustda Kvebek (Kanada), 22-23 avqustda Bakı (Azərbaycan), 28-29 avqustda Debretsen (Macarıstan) və 2-3 sentyabrda Monreal (Kanada) mərhələ yarışları olacaq.

Bu mərhələlərin cəminə görə yüksək xal toplamış komandalar 16-17 sentyabrda Monqolustanın paytaxtı Ulan-Batorda keçiriləcək final mərhələsinə vəsiqə qazanacaq.