“İlk olaraq "NTD-İndiqo" kollektivini təbrik edirəm. Çox yaxşı mübarizə apardılar”.

Prosport.Az xəbər verir ki, bu sözləri “Xəzri” komandasının baş məşqçisi Murat Dikmən Azərbaycan Basketbol Liqasının XIII turunda “NTD-İndiqo”ya 89:85 hesabı ilə qalib gəldikləri oyundan sonra klubun mətbuat xidmətinə açıqlamasında deyib.

Öz komandasının çıxışını dəyərləndirən mütəxəssis 2 fərqli hissə oynadıqlarını bildirib: “Bu görüşdə ümumilikdə müdafiəyə daha çox köklənmişdik. Xüsusilə Qrifin Remini necə dayandıra biləcəyimizi öncədən planlaşdırmışdıq. Buna uyğun olaraq da istədiyimiz baş tutdu. İlk hissədə hücumda inamlı təsir bağışlamadıq. Ancaq böyük fasilədən sonra ardıcıl olaraq 3 dəqiq 3 xallıq atışla sükanı ələ almağı bacardıq. Ardınca da tamamilə oyun bizim nəzarətimiz altına keçdi”.

Mütəxəssis qalib gəldikləri üçün çox xoşbəxt olduqlarını söyləyib: “Sevincimizi yaşadıq, indi isə “Şəki” ilə qarşılaşmaya köklənməliyik. Milli fasilə öncəsi qələbə qazanmaq bizim üçün çox vacibdir”.