"Oyunu sırf uşaqlar uddu. Mənim xəbərim yoxdur. Özləri hazırlaşdılar, dedilər ki, oyunu özümüz çıxaracağıq. Bura sadəcə tamadalıq etməyə gəlmişəm. Azarkeşlərə təşəkkür edirəm ki, bu atmosferi bizə yaşatdılar. Hər iki komandanın azarkeşləri futbol oyununun ritmini saxladılar. Bu gün komnada ən yaxşsını edir. Azarkeşlərin stadiona gəlməsi bizə stimul verir. Onlar gəlsin ki, bizim də işimiz yüngülləşsin. Hansısa futbolçunu komandaya dəvət edəndə, tribunalara baxır. Oynamaq bizdən, tirbunaları doldurmaq azarkeşlərdən. Sumqayıt idman şəhəridir. "Məşqçi filan şey etdi, futbolçu niyə vurmadı" sözlərini gəlib stadionda desinlər".
Prosport.Az xəbər verir ki, bu sözləri "Sumqayıt"ın baş məşqçisi Samir Abasov Premyer Liqanın XXI turunun "Neftçi" ilə oyunundan (2:1) sonra keçirilmiş mətbuat konfransında deyib. O, jurnalistlərin suallarını da cavablanıdırıb.
– Kazimir Ninqanın performansını necə dəyərləndirirsiniz?
– Ümumi komanda bu gün yaxşı idi. Bir neçə oyun əvvəl güc bölgüsü ilə bağlı danışmışdım. Bu oyunda baş verənlər də sözlərimə "peçat" oldu. 2-ci hissə başlayandan sona qədər komandada çöküş getdi. Biz rəqibə görə oynadıq, əks-hücumlara keçdik. Amma onları yüksək səviyyədə edə bilməməyimizin səbəbi gücümüzün o dərəcədə olmaması idi. Son kubok matçında çox enerji sərf etdik. Bilirdik ki, stadionun açılışı olacaq və "Neftçi" ilə oyuna köklənməliyik. Kubokda hər şeyin bizim üçün itdiyini demək olmaz. Doğrudur, bizim yolda "Sabah", "Neftçi", "Qarabağ" var. Bizi bura niyə salmısınız? Bircə, "Qalatasaray" qalıb, onu da gətirin də. Çox çətin olacaq. Başa düşürük. Amma yenə də əlimizdən gələni edəcəyik.
– Matçın son dəqiqələri çox emosional alındı. Həmin anlarda nə baş vermişdi?
– Biz elə bildik ki, oyun bitdi. 4-cü hakim deyir ki, siz hara gedirsiniz, nə edirsiniz? Amma saniyələr qalmışdı. Elçin Məsiyev də penaltidən sonra 1 dəqiqə göstərmişdi, biz də baxırdıq dəqiqəyə. Hər şey ola bilərdi. Şükür Allaha, belə bitdi. Müdafiəçilərimiz rəqibin təzyiqinə baxmayaraq, ayaqüstə qala bildi.
– Futbolçularınız 3 gün əvvəlki kubokdakı məğlubiyyətin əvəzini çıxa bildi. Bəs, həmin oyuna başqa motivasiya ilə çıxmışdılar?
– Xeyr, başqa motivasiya deyildi. Bugünkü görüş həmin oyunun davamı idi. Motivasiya siz fikirləşdiyiniz kimi olsaydı, 0:3-dan sonra sınmış komanda görərdiniz. Amma həmin komandamızdan "buranın yiyəsi bizik, udmaq istəyən komanda bizik" ab-havasını gördük. Matçdan qabaq uşaqlara dedim ki, oynayacağınız görüş növbəti matçlara təsir edəcək. Uşaqlar mənə də dedilər ki, narahat olmayın. Kubok matçı 0:3 bitsəydi, inanmıram ki, bu gün belə olardı.
– Qısa müddətdə bir rəqiblə 3 dəfə qarşılaşmaq komandaya necə təsir edir?
– Mənfi təsir edir. Oyunlarda da hiss olunur, get-gedə də hiss ediləcək.