"Qələbə və yeni stadionun açılışı münasibətilə "Sumqayıt”ı təbrik edirəm. Stadionda bu gün gözəl atmosfer var idi. İlk yarıda bizdə çox şey alınmadı. “Sumqayıt” daha yaxşı idi. 2-ci yarıda oyunu dəyişməyə nail olduq. Bəzi məqamlarda qol da vura bilərdik, buraxmaq təhlükəsi də var idi. “Sumqayıt” layiqli şəkildə bu gün qalib gəldi. Biz həm kuboka, həm də çempionata eyni dərəcədə hazırlaşırıq. Sadəcə, bugünkü oyuna yaxşı hazırlaşmamışdıq".

Prosport.Az xəbər verir ki, bu sözləri "Neftçi"nin baş məşqçisi Miodraq Bojoviç Azərbaycan Premyer Liqasının XXI turunun "Sumqayıt"la oyunundan (1:2) sonra keçirilmiş mətbuat konfransında deyib.

Monteneqrolu mütəxəssis jurnalistlərin suallarını da cavablandırıb.

– Azər Əliyev oyuna hazır görünmürdü, Yeqor Boqomolski isə ötən matçdan fərqli olaraq, bu dəfə heç nə ilə yadda qalmadı. Əlavə olaraq, Emin Mahmudovu 86-cı dəqiqədə əvəzlədiniz. Niyə bu qədər gözlədiniz?
– Rəqibimiz yaxşı oynadı. Hər bir məşqçi komandasının güclənməsini istəyir. Amma indi buna imkan yoxdur. Sırf futbolçuların performansına gəldikdə, hər oyun fərqlidir. Yeqor keçən görüşdə qol vurmuşdu, bu dəfə alınmadı. Axı, hər oyunun hekayəsi fərqli olur. Eminin əvəzlənməsinə gəlincə, ayağında ağrılar var idi deyə, əvəzlədik. 

– Daimi əsas heyəti tapa bilmisiniz?
– Reziuan Mirzov və Brayan Moreno fiziki baxımdan tam hazır deyil. Hər ikisinin durumu düzəldikdən sonra rəqabət də artacaq. Biz özümüz də, ideal "11-liy"i axtarırıq. Amma bir şey var ki, yaxşı oynamaq üçün, çoxlu oyun oynamalıyıq. 

– Bu gün "Neftçi"nin yarımmüdafiə xətti çoxlu səhvə yol verdi. Sizcə, bunun səbəbi nə idi?
– Təbii ki, oyunu təhlil edəcəyik. Ola bilsin ki, az qaçdıq. Həm də, topla yaxşı deyildik, fərdi mübarizələrdə uduzurduq. Bunlar da öz təsirini göstərir.

– Rusiyadan hansısa oyunçunu "Neftçi"yə dəvət etməyi planlaşdırırsınız?
– Bizdə transferə baxan mütəxəssislərimiz var.