"Oyun rəqib komandanın üstünlüyü ilə başladı. Onların startda bu cür sürətli hücumları bizim üçün gözlənilməz idi. Bu səbəbdən də fasiləyə kimi oyunumuz istədiyimiz tərzdə keçmədi. Hətta 4-cü perioda 15 xallıq fərqlə geridə başladıq. Demək olar ki, 3 hissə ərzində edə bilmədiyimizi 4-cü periodda reallaşdıra bildik".

Prosport.Az-ın məlumatına görə, bunu "Cəlilabad" basketbol klubunun baş məşqçisi Şəhriyar Əsgərov deyib.

Təcrübəli məşqçi Azərbaycan Basketbol Liqasının XIII turunda "Şəki"yə qarşı 90:86 hesablı qələbə ilə yekunlaşan oyundan sonra fikirlərini bölüşüb. Onun sözlərinə görə, komandası təslim olmayıb: 

"Oyunun gedişində taktiki dəyişiklik etdik, fərdi və personal oyuna keçdik. Bu səbəbdən də həmin müddətə qədər rəqibin ən yaxşı oyunçusu olan Kris Klarka çətin anlar yaşatmağa başladıq. Matçın sonuna kimi səbirli davrandıq, nikbinliyimizi itirmədik və yekunda qələbəni qazandıq. Komandam bu gün əsl xarakter göstərdi. Xüsusilə də bəzi oyunçularımı vurğulamaq istəyirəm.

Kapitanımız Zaur Paşayev ciddi zədəyə rəğmən, bu gün möhtəşəm performans göstərdi. O digərləri üçün əsl nümunədir. Oyunu 26 xalla başa vurdu. 3 xallıq atışlarda 12 cəhddən 7-si dəqiq alındı. Bu, bizim liqa üçün fantastik göstəricidir. Levan Qoqaladze də bu gün yaxşı təsir bağışladı. Düzdür, oyunun sonlarında 5 qayda pozuntusuna görə meydançanı tez tərk etməli oldu. Buna rəğmən, Levan bu gün çox yaxşı oynadı. Culian Pauel də bu gün gözəl oynadı. Həmçinin, Seyidhüseyn Eynullayev də sonluqda 2 xallıq dəqiq atışla qələbəni qazandıranlardan biri oldu. Bir sözlə, komandam bu gün möhtəşəm geridönüş etdi və yekunda qalib gəldi".