Azərbaycan Basketbol Liqasının XIII turunda "Neftçi" "Sumqayıt" üzərində qələbə qazanıb – 113:96. 

Prosport.Az xəbər verir ki, baş məşqçilər oyundan sonra fikirlərini bildirib.

"Sumqayıt"ın baş məşqçisi Teymur Hüseynovun fikirlərini təqdim edirik: "Neftçi" bizimlə oyundan əvvəl 2 legionerlə gücləndi. Onların həqiqətən də yaxşı basketbolçu olduğunu bu gün gördük. Amma mən öz oyunçularımdan bu gün razı qaldım. Döyüşdük. Doğrudur, səhvlərimiz oldu. Amma rəqibi əks-hücumlarda tuta bilirdik, yaxşı qaçırdıq. Hərçənd, yaxşı müdafiə oluna bilmirdik. Bunu da yorğunluqla əlaqələndirərdim. Bilirsiniz ki, oynayan cəmi 6-7 basketbolçumuz var. Rəqib daha çox rotasiya edə bilir. İstənilən halda, növbəti oyunlarda sona qədər mübarizə aparacağıq. İndidən nə deyə bilərəm ki?! Əlimizdən nə gəlir ki?! Hər şey göz qabağındadır. Nəzərə almaq lazımdır ki, Nəzər Quliyev zədəli idi, Dikson tam hazır deyildi. Hətta mən elə bilirdim, o oynamayacaq. Çətindir..."