"Xırdalan" komandasının baş məşqçisi Uğur Özdemir Azərbaycan basketbol liqasının XIII turunda "Gəncə" üzərində qazanılan qələbədən (93:87) sonra klubun mətbuat xidmətinə müsahibə verib.

Prosport.Az həmin müsahibəni təqdim edir.

- Oyun haqqında fikirləriniz? "Gəncə" komandası hazırda olduğu pilləyə layiq komanda deyil. Gözəl basketbol oynayırlar. Bu gün də sona qədər mübarizə apardılar. Çox yaxşı baş məşqçiləri eyni zamanda oyun üslubları var. Ona görə onlara parket üzərində göstərdikləri performansa görə təşəkkür edirəm. 

- Komandama gəlincə, 3 xallıq atışlardan istədiyimiz kimi yararlana bilmədik. Bu bizim üçün problemli nöqtə idi. Çünki, biz bu zonadan da çox xal qazanan komandayıq.Amma bu gün atış göstəricimiz yaxşı olmadı. Bundan əlavə tək oyun qurucusu ilə oynamaq məcburiyyətində qaldım. Jessy Ghee oyunun əvvəlində zədələndi. Daha sonra oyun nizamımızı tapıb xallar toplamağa başladıq. Çətin bir oyun oldu. Bizə əsas qələbəni gətirən amil açıq sahəni daha yaxşı oynamağımız oldu.

- Qələbəyə rəğmən üzünüz gülmür. Səbəb? 

- Oyunçularım bu oyuna tam kökləndiyini düşünürdüm. Amma "Sabah" qələbəsindən sonra bu matça köklənməkdə çətinlik çəkdikləri hiss olundu.Bu məqam məni narahat edir.Bu haqda onlarla söhbətim olacaq. Bundan əlavə, oyunda qayda pozuntularının sayı çox oldu. Bu tempin aşağı düşməsinə səbəb oldu. Mövsüm davam edir. Fasilədən öncə "Ntd-İndiqo" ilə oyunumuz var. Bu oyunu da udub yolumuza davam etmək istəyirik.