Türkiyə I Liqasının XX turunda Azərbaycan pasportu olan 2 oyunçunun dueli baş tutub.

Prosport.Az-ın məlumatına görə, 17, 19 və 21 yaşadək millimizin sabiq üzvü Barış Əkinçiərin çıxış etdiyi "Şanlıurfaspor" Vüsal İsgəndərliyinin oynadığı "Boluspor"u qəbul edib.

Barış Əkinçiər 79-cu dəqiqədə Qvineya-Bisaulu Aldairlə əvəzlənib. Vüsal İsgəndərlini isə 89-cu dəqiqədə müdafiəçi Ərcan Coşkun əvəzləyib. Bununla belə, matçın yeganə qolunda Vüsal yaxından iştirak edib. Şimali makedoniyalı Daniel Avramovskinin 50-ci dəqiqədə vurduğu qolda İsgəndərlinin sağ cinahdan etdiyi ötürmə əsas rol oynayıb.

Bəs digər legionerlərimiz ötən həftə nə ilə yadda qalıb?

Türkiyə Super Liqası
XXIII tur
"Adana Dəmirspor" – "Hatayspor" 0:1 (Şahruddin Məhəmmədəliyev 90 dəqiqə oynayıb, 44-cü dəqiqədə portuqaliyalı komanda yoldaşı Naninin avtoqoluna mane ola bilməyib. Renat Dadaşov 48-ci dəqiqədə sarı vərəqə alıb, 69-cu dəqiqədə fransalı Mehdi Bucemaa ilə əvəzlənib) 

"Adana Dəmirspor" 31 xalla 8-ci, "Hatayspor" 25 xalla 15-cidir.

Türkiyə I Liqası
XX tur
"Manisa" – "Ərzurumspor" 0:2 (Sərtan Daşqın 90+4-cü dəqiqədə birbaşa qırmızı vərəqə alıb)
"Eyüpspor" – "Tuzlaspor" 4:0 (U-19, U-21 və əsas millimizdə çıxış etmiş İltər Daşqın bu oyunu dizindəki zədəyə görə buraxıb. Bəxtiyar Həsənalızadə isə naməlum səbəblərdən heyətə salınmayıb)
"Ümraniyəspor" – "Sakaryaspor" 1:1 (Coşqun Diniyev 83-cü dəqiqədə Atalay Babacanla əvəzlənib)
"Altay" – "Kocaelispor" 0:2 (Ramil Şeydayev 40-cı dəqiqədə sarı vərəqə alıb, 71-ci dəqiqədə isveçli Kristian Kuaku ilə əvəzlənib)

"Eyüpspor" 48 xalla 1-ci, "Kocaelispor" 39 xalla 3-cü, "Boluspor" 29 xalla 9-cu, "Ümraniyəspor" 24 xalla 10-cu, "Manisa" 23 xalla 11-ci, "Şanlıurfaspor" və "Tuzlaspor" 19 xalla 15-16-cı yerdədir.