“Getdiyim yer haqda o qədər də danışmaq istəmirəm ki, niyə millidən ayrıldım. Altı illik danışıq oldu, sonra üç illik müqavilə imzalandı”.
Prosport.Az xəbər verir ki, bu sözləri “Qarabağ”ın baş məşqçisi Qurban Qurbanov deyib.
52 yaşlı mütəxəssis İTV-yə müsahibəsində Azərbaycan milli komandasından ayrılmasını xatırlayıb: “Bu sual mənə çox verilib. İstəyirəm ki, bir dəfəlik bilinsin. Mən millidən getmədim. Bu məsələ ilin sonunda İcraiyyə Komitəsində müzakirəyə çıxarıldı. Milliyə gələndə olduğu kimi gedəndə də iclas zaman kənarda qaldım. Qayda ilə mən olmadan müzakirə olundu. İşim müzakirə edildi və sonra bildirildi ki, səninlə yolları ayırırıq. Dərinliyə getmək istəmirəm və “oldu” dedim. Millidən getməyim belə oldu”.
Qurbanov millinin baş məşqçi postuna dəvət edilməsi ilə bağlı mətbuatda yazılanlara münasibət bildirib: “Bir xeyli əvvəl belə yazılar çıxmışdı ki, AFFA-dan mənimlə əlaqə saxlayıblar. Yox, mənimlə heç kim əlaqə saxlamayıb, heç bir təklif olunmayıb. Bu yazıların haradan qaynaqlandığını bilmirəm. Bəlkə siyasi gedişdir, siyasi addımdır. Heç kimlə danışığım, görüşüm olmayıb. Ümumiyyətlə, milli komandanı müzakirə etməmişik. Eşitdiyimə görə, millidə yerli baş məşqçi olmamalıdır, sanki legioner təyin ediləcək. Ona görə İşçi Qrupu yaradılıb”.
Mütəxəssis yığmada çalışdığı dövrdə böyük təcrübə topladığını qeyd edib: “Çox böyük futbol təcrübəm var. Həm futbolçu, həm məşqçi kimi təcrübəyə malikəm. Ən böyük təcrübəm millinin baş məşqçisi kimi çalışdığım bir il ərzində oldu. Futbola daha çox necə yanaşmalıyam və nələrə hazır olmalıyam. Bu müddət mənə futbolda keçirdiyim bütün illərin təcrübəsindən artıq oldu. Çox şey gördüm, çox çalışdıq. Həm insanlar, həm iş prinsipləri, həm tələblər fərqlidir. Uğur üçün insanların fikirlərinin üst-üstə düşməsi lazımdır. Hamının fikri o hədəfdə olmalıdır. Bu yoxdursa, uğur qazanıla bilməz. “Qarabağ”ın bugünkü uğuru da bundadır. Rəhbərlik, məşqçilər, futbolçular və işçilərimizin hədəfi eynidir. Amma AFFA-da bunu edə bilmədim. Fikirlər fərqli ola bilər. Heç nəyimiz alınmadı da demək olmaz. Bir məğlubiyyətimiz oldu. Yaxşı sistemimiz formalaşırdı. Bəzən alınmır. Mən və onların işi alınmadı. Heç kimi qınamıram”.
Qurbanov yenidən milliyə qayıtmağın əleyhinə olmadığını etiraf edib: “Qarşıma məqsəd qoymamışam ki, mütləq milliyə getməliyəm. Belə hədəfim yoxdur. Söhbət Azərbaycan futbolundan gedir. Hər şey müzakirə olunmalıdır ki, Azərbaycan futboluna kim və nə faydalı ola bilər. Mənim iş prinsipimdə belə bir şey yoxdur ki, orda mənə qarşı pis oldular və yaxud da nə isə baş verdi, ora getməyəcəm. Bu, qarşımdakılara hörmətsizlik olar. Hansısa azarkeş nalayiq ifadə işlədibsə və ya rəhbər mənə narazılıq edibsə, mən vətənimə, işimə sevgimi əlimdən ala bilməz”.
Qeyd edək ki, Qurbanov 2018-ci ildə Azərbaycan millisinin baş məşqçisi olub.