“Braqa” çox ciddi rəqibdir. Portuqaliya təmsilçiləri avrokuboklarda həmişə ən məsuliyyətli klublardır”.

Prosport.Az xəbər verir ki, bunu “Qarabağ”ın baş məşqçisi Qurban Qurbanov deyib.

Təcrübəli mütəxəssis İTV-yə müsahibəsində Avropa Liqasının pley-offunda qarşılaşacaqları “Braqa” haqda fikirlərini açıqlayıb: “Avropa nəhəngləri, İspaniya, İngiltərə, böyük "5-lik” klubları olsa da, Portuqaliya komandaları “Benfika”, “Portu” və digərləri də çox böyük uğurlar əldə edib. Onların avrokuboklara yanaşması başqadır. Hər şeyə real baxaq. Bizdən çox üstündürlər. Bu üstünlük həm çempionat, həm ölkə futbolu, həm struktur baxımından hərtərəflidir. “Braqa”nın oyun üslubu ilə maraqlanmışıq. Bu komandaya qarşı oynamaq olar və oynayacağıq”.

Qurban Qurbanov “Braqa”nı çox güclü rəqib hesab etdiyini də bildirib: “Çox təhlükəli komandadır. “Braqa” istənilən rəqibi, hətta özündən güclü klubu da məğlub edə bilər. Çünki oyun fəlsəfələri elədir ki, yaxşı, sürətli, dinamik futbol göstərirlər. Həm də öz oyunlarından əl çəkmirlər. Hətta “Bayer” bəzi oyunlarda 4-lü, bəzən 5-li müdafiə oynayır. Amma “Braqa” öz oyun fəlsəfəsini daim yaxşılaşdırmağa çalışır. Çox istərdim ki, futbolçularımız bu matçda ürəklə, çəkinmədən yaxşı oyun göstərsinlər. Komandanı buna hazırlayırıq. Hədəfə çatmaq üçün öz oyun fəlsəfəndən əl çəkməməlisən. “Braqa” bizdən güclüdür və oyunumuzu müdafiədən quracağıq desək, matç başlamadan məğlub olarıq. Futbolçularda inam itəcək. Hədəfimiz odur ki, bu rəqiblə görüşlərdə düşüncələrimizdən əl çəkməyək. Ola bilər ki, məğlub olaq, istəyimiz alınmasın. Çempionatda istədiklərimizin 70-80%-i alınırsa, “Braqa” ilə görüşdə 20-30% ola bilər. Amma eybi yox, təki alınsın. Heç alınmamaqdansa, 20-30% alınsın. Bu gün 20-30-dursa, qarşıdakı matçlarda daha da artacaq. Azarkeşlərimiz üçün yaxşı oyun göstərmək istəyirik. Nəticə üçün hazırlaşacağıq”.

Qeyd edək ki, “Qarabağ”la “Braqa” arasında matçlar fevralın 15-də və 22-də keçiriləcək.