Karate üzrə Azərbaycan milli komandasının üzvü Fidan Teymurova Fransanın paytaxtı Parisdə keçirilən Premyer Liqa turnirində 3-cü yeri tutub.

Prosport.Az xəbər verir ki, gənclər arasında ikiqat dünya finalçısı olmuş karateçimiz 50 kq çəki dərəcəsində bürünc mükafata sahib çıxıb.

O, bürünc medal uğrunda döyüşdə ukraynalı Yuliya Palaşevskayaya 6:4 hesabı ilə qalib gəlib. Bu, Fidan Teymurovanın Premyer Liqada qazandığı ilk medal olub.

Tural Ağalarzadə (67 kq) isə bürünc medal görüşündə iordaniyalı Afif Qaitə 2:6 hesabı ilə uduzaraq medalsız qalıb.

Qeyd edək ki, bu gün başa çatan turnirdə Azərbaycan 7 idmançı ilə təmsil olunub. Üçqat dünya çempionumuz İrina Zaretskaya bu yarışın iştirakçısı olmayıb.