"Neftçi" Azərbaycan Premyer Liqasının XX turunda doğma meydanda "Qəbələ"ni 3:1 hesabı ilə məğlub edib.
Prosport.Az xəbər verir ki, "ağ-qaralar"ın baş məşqçisi Miodraq Bojoviç matçdan sonra keçirilən mətbuat konfransında jurnalistlərin suallarını cavablandırıb:
– Oyun gözlədiyimiz kimi ağır keçdi. "Qəbələ" xoşagəlməz vəziyyətdədir. Buna görə də onlar ilk hissədə müdafiəfə yaxşı oynadı. Həm rəqibin, həm də bizim qol vurmaq üçün imkanlarımız var idi. Məncə, yaxşı oyun keçdi. 2-ci hisssədə biz 1 qol vurduq. Rəqib azlıqda qaldı, ardınca 2-ci qol da gəldi. Düşünürdük ki, bu qollardan sonra oyunumuz daha rahat keçəcək. Amma əksi oldu. Nəticədə rəqibə qol vurmağa imkan yaratdıq. Sona qədər narahatlıq içində idik. Amma ən əsası qələbə qazandıq və 3 xalı əldə etdik.
– Azər Salahlı ilk hissədə səhvlərlə yadda qaldı. Eyni mövqedə oynayan Azər Əliyev də tez-tez zədələnir. Bu mövqedə olan problemi necə aradan qaldıracaqsınız?
– Sizinlə razı deyiləm. Azər Salahlı pis oynamadı. Bu onun mövqeyi deyil. Azər Əliyev zədəlidir deyə, Salahlını həmin mövqedə istifadə edirik. Əliyev artıq zədəsini sağaldıb və bu mövqedə rəqabət olacaq. Düşünmürəm ki, hər hansı yeni oyunçu komandaya cəlb olunacaq.
– Sol cinahda Kilan Lebon, Reziuan Mirzov və Alfa Konte kimi oyunçular var. Sağ cinah isə Rəhman Hacıyevin ümidinə qalıb. Bu mövqe ilə bağlı nə düşünürsünüz?
– Konte sağ cinahda oynayır. Sadəcə, bu gün belə əvəzetmə etdik.
– Oyun planında müsbət və sizi narahat edən məqamlar hansılardır?
– Bu komandanın keyfiyyəti var. Biz hazırda bir az səbir etməliyik. 24-cü gündür ki, bu işə başlamışıq. Bir az səbir edib keyfiyyəti artırmaq mümkündür.
– Sıx qrafikə qədəm qoyursunuz. 10 gündə "Sumqayıt"la 3 dəfə qarşılaşacaqsınız. Eyni rəqiblə qısa müddətdə tez-tez üz-üzə gəlmək necədir?
– Bu bizim işimizdir. Burada olan hər kəs peşəkardır. Əlbəttə ki, eyni komanda ilə ard-arda 3 dəfə oynamaq asan deyil. Amma biz peşəkarıq, işimizi icra edəcəyik.
– Komanda uzun ötürmələrə daha çox bel bağlayır. Bu, rəqibə uyğun olaraq qurulan sistemdir?
– Oyunda dərinliyi axtarmağa çalışırıq. Geriyə ötürmə atdıqdan sonra sürətli cinah oyunçularını hücuma cəlb etmək istəyirik. Ona görə də belə uzun ötürmələr olur.
– Qarşınıza Premyer Liqada 2-ci olmaq və kuboku qazanmaq məqsədi qoyulub. Bu məqsədə çatacağınızdan əminsiniz?
– Məncə, komanda keyfiyyətinə görə buna qadirdir. Bu tapşırığı icra etməyə çalışacağıq. Vaxt məhdudiyyəti var. Vaxtımız kifayət qədər olsa, buna nail olmaq mümkündür. Yerinə yetirə bilməsək, baxarıq görək, nələr baş verəcək.