"Sumqayıt" Azərbaycan Premyer Liqasının XX turunda səfərdə "Araz-Naxçıvan"la 1:1 hesablı heç-heçə edib.
Prosport.Az xəbər verir ki, "kimyaçılar"ın baş məşqçisi Samir Abasov matçdan sonra keçirilən mətbuat konfransında jurnalistlərin suallarını cavablandırıb:
– Futbolçularıma təşəkkür edirəm. Hücum xətti olmadan 1 xal qazanmaq heç də pis deyil. Hər qazandığımız xal bizim üçün uğur sayılacaq. Uduzmamaq üçün çox əziyyət çəkdik. Bu gün itkiləri saymaq istəmirəm.
– Avrokuboklar zonasında qalmaq üçün planınız nədir?
– Bu gün əlimizdə bayraq etməmişik ki, burada qalacağıq. Bizim üçün həddindən artıq çətin olacaq. Özünüz görürsünüz ki, oyunlar hansı məcrada keçir. Gərginlik daha da artır. Çalışacağıq ki, realist yanaşaq. Bundan sonra da xallar itiriləcək. Panikaya düşməmək lazımdır. Bu gün olduğumuz yer bizi təzyiq altına salmalı deyil. Məqsədimiz avrokuboklar deyil. Əsas məqsəd komanda qurmaqdır. Boşluqlarımız çoxdur. Oyunumuz əvvəldən axıra kimi eyni tempdə getmir. Bu gün hücum xəttimiz, demək olar ki, yox idi. Olduğumuz yerdə qala bilsək, yaxşı olar.
– Qarşıda "Neftçi" ilə oyununuz var. Hücum xətti olmadan çətinlik çəkməyəcəksiniz?
– Hücumçumuz yoxdur demədim. Sadəcə, bu oyunda hücum xətti yox dərəcəsində idi. Növbəti matçda çalışacağıq ki, vəziyyəti düzəldək. Kubok və ya çempionat oyununu bölə bilmərik. Amma bölməliyik. Düşünürəm ki, kuboku qurban verməliyik. 13-14 nəfərlə 2 cəbhədə oynamaq çətindir. Getdikcə güc balansı 100% üzə çıxacaq. 17 gün ərzində eyni oyunçularla 5 oyun oynamaq... Bizim üçün yazılan qanundur. Realist olaq, 2 cəbhədə oynamaq çox pis nəticələnə bilər.
– Rövlan Muradovun oyunundan nə dərəcədə razı qaldınız?
– Rövlanın oyunundan razıyam. Uduzmaq istəmirdi. Bu, Rövlanda görünürdü. Canını qoyurdu. "Sumqayıt" kimi komanda üçün Rövlanın etdikləri mənim üçün çox xoşdur.
– Transfer məsələləri ilə bağlı rəhbərliklə aranızda fikir ayrılıqları var?
– Ümumiyyətlə transferdən danışmaq istəmirəm. Olacaqsa, gəlib oynayacaqlar. Dəfələrlə demişəm ki, transfer lazımdır.
– Son açıqlamanıza görə danışmaq istəmirsiniz?
– Xeyr, ümumiyyətlə danışmaq istəmirəm.