"Futbolçularımı təbrik edirəm. Çox gərgin oyun oldu. Vacib 3 xal əldə etdik. Qarşımızda istəkli və ciddi rəqib var idi. Belə geridönüşlər futbolçulara inam verir. Azarkeşlərimizə təşəkkür edirəm".
Prosport.Az xəbər verir ki, bu sözləri "Qarabağ"ın baş məşqçisi Qurban Qurbanov Premyer Liqanın XX turunun "Kəpəz"lə matçından (1:2) sonra keçirilmiş mətbuat konfransında deyib. O, jurnalistlərin suallarını cavablandırıb:
– Nədən narazı qaldınız?
– Çox deməzdim. Narazı qaldığım bəzi epizodlar oldu. Qəbələdə, Gəncədə, Tovuzda yaxşı oyun göstərmək çətindir. Amma futbolçular ciddi və diqqətli idi.
– Buraxdığınız qolu necə şərh edərdiniz?
– Şərh olunacaq bir şey yoxdur. Standard vəzityyətdir. Qapıçı ilə Bəhlul Mustafazadənin toqquşmasından sonra boşluq yarandı.
– Yassin Benzyanın zədələndiyi epizodda qapıçıya qırmızı vərəqə verilməli idi? Futbolçunun durumu necədir?
– Qərar hakimlərin olmalıdır. Məncə, həmin epizod qırmızı vərəqə idi. Amma paltardəyişmə otağında qapıçılarımız dedilər ki, orada qırmızı vərəqə yox idi. Benzyanın durumu yaxşı deyil, həkimlər başına tikiş qoydu. Baş gicəllənməsi var idi. Çox sərt zərbə aldı. Dəqiq durumu sabah bilinəcək.
– Redon Cicanın zədəsi ciddidir?
– Ciddi bir problem olmalı deyil. Yorğunluqdan əzələsində gərilmə oldu. Sabahkı müayinədən sonra dəqiq məlumat biləcəyik.
– Rişard Almeydanın yerdə qaldığı epizodda Marko Veşoviç etiraza görə sarı vərəqə gördü. Bundan sonra Bədəvi Hüseynov onunla çox aqressiv danışdı. Onu bu davranışına görə əvəzlədiniz?
– Bədəvidən heç nə olmaz. Qoy aqressiv davranmağı öyrənsin. Əvvəlcədən bu əvəzetməni planlaşdırmışdı. Sıx qrafikdəyik. Futbolçuları çox yormaq olmaz.
– 2-ci yerdən 17 xal öndəsiniz. Belə durumda komandanı motivasiya etmək çətin deyil?
– Deməzdim ki, təsir edir. Mənim tələblərim, proqramım olduğu kimi davam edir. Futbolçular da bunu ürəkdən yerinə yetirir. Nə qədər desək də, bəzən futbolçularda arxayınlıq olur. Amma bu o demək deyil ki, biz hər şeyi təmin etmişik.
- Aleksey İsayev "Braqa" ilə oyunlara qədər komandaya uyğunlaşacaq?
- İsayevin bizim tələblərimizə uyğunlaşmağa ehtiyacı yoxdur. Təcrübəli futbolçudur. Amma onu potensialı bu deyil. Daha da yaxşı olmalıdır. Komandamıza fayda verəcək futbolçudur. Gələcəkdə ondan daha yaxşısını tələb edəcəyik.
- Xabi Alonso ilə görüşdükdən sonra onun adı "Liverpul"la hallanır. Görüş zamanı bu haqda danışdınız?
- Yox. O barədə danışmadıq. Biz sırf işlə bağlı görüşmüşük.