"Mühüm qələbə idi. Evdə seriyamızı davam etdirmək istəyirdik. Ağır oyundan gəlmişdik. Bu gün futbolçular ilk dəqiqələrdən xarakter göstərdi. İstədəyimiz hücumlar oldu. Rəqibin boşluqlarından düzgün istifadə etdik. 2-ci hissədə oyun bir az dəyişdi. Futbolçularım uduzmaqdan qorxurdu. Bu da normaldır. Ötən oyunda baş verən hadisələr onlara təsir edib. Belə oyunlar vacibdir. "Səbail" yaxşı rəqibdir. Mövsüm davam edir. Maraqlı çempionatdır. Aşağıdan uzaqlaşırıq, yuxarıya yaxınlaşırıq".

Prosport.Az xəbər verir ki, bu sözləri "Turan Tovuz"un baş məşqçisi Ayxan Abbasov Premyer Liqanın XX turunun (3:1) "Səbail"ə qarşı keçirilmiş oyunundan sonra mətbuat kofransında deyib.

– İstədiyiniz "Turan Tovuz"u görmək üçün nə qədər vaxt lazımdır?
– Əlbəttə, vaxt lazımdır. Konkret nəsə demək olmaz. İlk günlə bugünkü "Turan Tovuz" arasında fərq var. Vaxt nə qədər çox olsa, heyət qorunsa, yaxşıya doğru gedəcəyik.

– "Turan Tovuz" evdə "Səbail"ə qalib gələ bilməmişdi. Matça bu motivasiya ilə çıxmışdınız?
– Futbolçularıma demişdim ki, "Səbail"ə bu mövsüm 2 dəfə məğlub olmuşuq. Həmişə istəyirəm ki, bütün komandalardan xal ala bilək. Bu gün ümumi durum bizi motivasiya edirdi. Çünki azarkeşlərimizi sevindirmək istəyirdik.

– "Kəpəz"lə matçdan sonra demişdiniz ki, hakimlərə də qalib gəlməliyik. Bu gün onlara qalib gələ bildiniz?
– Çətin oyun idi. Rauf Allahverdiyev öhdəsindən gəldi. Mübarizə çox idi. Hakim yaxşı olanda, həmişə oyundan sonra demişəm. Bizim istədiyimiz odur ki, düzgünlük olsun, oyunun nəticəsinə təsir edən səhvlər baş verməsin. VAR oyuna müdaxilə etməyəndə bizi düşünməyə vadar edir. Ötən oyun ona görə həmin sözü dedim ki, 2 eyni epizodda fərqli qərar verdilər.

– Sizcə, bu gün AFFA-nın baş katibi Sərxan Hacıyevin Tovuza gəlməsi hakimliyə təsir etdi?
– Yox. Yəqin ki, Sərxan müəllim maraqlı oyun olduğu üçün gəlmişdi. Çox xoşdur ki, AFFA rəhbərliyi bölgələrdə oyunlara gəlir. Bakıdan çıxmaq lazımdır.