"NTD-İndiqo"nun basketbolçusu Qrifin Remi klubun mətbuat xidmətinə müsahibə verib.

Prosport.Az amerikalı basketbolçunun müsahibəsini təqdim edir: 

– Son oyunda komanda "Sabah"a məğlub oldu. Həmin matçdan hansı təəssüratlar qaldı?
– "Sabah"la oyundan sonra ikili hisslər keçirirəm. Bir tərəfdən, qələbə qazana bilmədiyimizə görə məyusuq. Digər tərəfdən, oyunda göstərdiyimiz cəsarət və xarakterlə fəxr edirəm. Bu mövsüm üçün böyük gözləntilərimiz var. Hər oyunda kimin rəqib olmasından asılı olmayaraq, qalib gəlmək şansımız olduğunu başa düşürük. Bu bizim üçün yaxşı təcrübə idi.

– Qarşıda "Gəncə" ilə oyun var. Şansları necə qiymətləndirirsiniz?
– Mövsümdə çox vacib bir mərhələ başlayır. Növbəti 3 oyun pley-off uğrunda mübarizə baxımından çox vacibdir. Cared Smol və Elşad Şirzadovun yoxluğunda işimiz daha da çətinləşir.

– "Gəncə" çempionatın ən güclü komandası deyil, amma doğma divarlarda çox güclüdür…
– "Gəncə" çox təhlükəli rəqibdir. Bu oyuna ciddi yanaşmasaq, nəticəsi heç də yaxşı olmayacaq. Rəqibin turnir cədvəlindəki mövqeyi bizi aldatmamalıdır, çünki son matçlarda yaxşı təsir bağışladılar. Onların məşqçisi yaxşı iş görür. "Gəncə" çox ciddi rəqibdir. 

– Qeyd etdiyiniz kimi, çempionatın vacib mərhələsi başlayır. Çempionatda oynayan rəqibləri necə qiymətləndirirsiniz və onlar arasında hansı komandanı əsas rəqib kimi görürsünüz?
– Hazırkı çempion həmişə xüsusi hörmətə layiqdir, çünki onlar bizim istədiyimizə nail olublar. Ancaq heç kimdən qorxmuruq. Biz heç bir komandaya əsas rəqib kimi baxmırıq. Sona qədər mübarizə aparırıq. Məşqlərdə tam güclə işləməsək, titul şansımız yoxdur. Amma çalışsaq, çempion olarıq.