Bu gün futzal üzrə 2022/23-cü il mövsümünün son oyunu keçirilib.

Prosport.Az xəbər verir ki, Azərbaycan kubokunun sahibini müəyyənləşdirən matçda Yüksək Liqanın gümüş və bürünc medalçıları – “Neftçi” İK və “Baku Fayr” qarşılaşıb. “Neftçi” İK həm də Azərbaycan kubokunun ötənilki sahibidir.

İlk hissənin ilk 10 dəqiqəsi daha çox qarşılıqlı hücumlarla yadda qalıb. Hesab isə 12-ci dəqiqədə açılıb. Bundan sonra nominal qonaqlar ardıcıl qollar vurmaqla fasiləyə 4 top üstünlüklə yollanmağı bacarıb.

İkinci hissəni “Neftçi” İK daha çox qapıçını meydan oyunçusu ilə əvəzetməklə keçirsə də, hesabda geridönüş edə bilməyib. Son dəqiqədə isə ötən ilki kubokun qalibi olmuş "Neftçi" iki 10 metrlik cərimə zərbəsindən yararlana bilməyib. Əksinə, rəqib fərqi artırıb, qələbəsini təmin edib. Yekunda qələbə qazanan “Baku Fayr” ilk dəfə Azərbaycan kubokunu qazanıb.

Mükafatları Azərbaycan Futzal Federasiyasının vitse-prezidenti Elşən Abbasov, İcraiyyə Komitəsinin üzvü Mahmud Sadıqov, federasiyanın əməkdaşı Xosrov Məmmədov təqdim ediblər. Əvvəlcə final matçını idarə etmiş hakimlərə və hakim-inspektora diplomlar verilib. Final görüşünün ən yaxşı oyunçusu “Baku Fayr” klubun qapıçısı Elnur Zamanov seçilib. “Neftçi” İK-ya finalın iştirakçısı olduğuna, “Baku Fayr”a isə qalib gəldiyinə görə medallar və Azərbaycan kuboku təqdim edilib.