"Barselona"nın baş məşqçisi Şavi İspaniya kubokunun 1/4 finalında "Atletik"ə məğlubiyyətdən (2:4) sonra klubdakı gələcəyindən danışıb.

Prosport.Az xəbər verir ki, mütəxəssis bu mövsümün sonunda klubdan ayrıla biləcəyini də istisna etməyib:

"Mövsümün sonuna qədər yüksək səviyyədə rəqabət aparmasaq, mən getməli olacağam. Harada olduğumu bilirəm. Bu, top klubdur. "Barselona"da titullar qazanmaq lazımdır, əks halda təhlükə altında olacaqsınız. Əminəm ki, bu komanda böyük potensiala malikdir və ən yaxşı gənc oyunçulardan ibarətdir”.

Xatırladaq ki, “Barselona” yanvarın 14-də finalda "Real"a uduzaraq İspaniya Superkubokunu da əldən verib. Kataloniya təmsilçisi hazırda La Liqanın turnir cədvəlində 44 xalla 3-cüdür. Komanda lider "Jirona"dan 8 xal geri qalır. 

Qeyd edək ki, Şavi 2021-ci ilin noyabr ayından "Barselona"ya rəhbərlik edir. Onun klubla müqaviləsi 2025-ci ilin yayına qədərdir.