"Mənim üçün maraqlı oyun oldu. III və IV dövrə maraqlı olacaq. Komandaların hamısı güclənib. Yeni futbolçularımızdan, oyunçularımdan razı qaldım. “Qarabağ”ı təbrik edirəm və qarşıdakı matçlarda onlara uğurlar arzulayıram. Bu gün “Qarabağ”a qarşı oynayırdıq. Yeni yaranmış “Araz-Naxçıvan” avrokuboklarda rəqiblərini çökdürən “Qarabağ”a qarşı oynayırdı. Onlarla matçda boşluqlarımız görünməsə, mənim üçün gülünc olardı. “Qarabağ” səviyyəsində olan komanda ilə başabaş oynamaq... Bu komandanın avrokuboklardakı çıxışını nəzərə alıb, yorğunçuluqlarından istifadə edib futbol oynamaq olar. “Qarabağ” 20 ildən artıqdır ki, Azərbaycan futbolunda dominantlıq edir. 15 günə yaranmış komanda “Qarabağ”la başabaş oynaya bilməz. Uşaqlar çalışır, meydanda vuruşurlar. Gənclərimiz də meydanda oynadı. Onları burada sınamasaq, harada oynayacaqlar? Get-gedə onların da yaxşı performansını görəcəyik. “Qarabağ”a qarşı oynamaq həmişə çətindir".

Prosport.Az xəbər verir ki, bu sözləri "Araz-Naxçıvan"ın baş məşqçisi Azər Bağırov Premyer Liqanın XlX turunun "Qarabağ"la (3:1) oyunundan sonra keçirilmiş mətbuat konfransında deyib. O, jurnalistlərin suallarını cavablandırıb.

– Xarici oyunçular transfer edəcəksiniz?
– Biz də istəyərdik ki, legioner dəvət edək. Araşdırmalarımız, seleksiyamız getmişdi. Sadəcə, son notlar lazımdır. Yaxşı oyunlarımız olsa, alınacaq. Əsas da hücum xəttinə oyunçu transferi fikirləşirik. Orada boşluqlar çoxdur. O komandayıq ki, rəqib qapısı qarşısında 3-4 epizod yaradıb, yararlana bilmirik. Bu da müdafiədə öz təsirini göstərir. Çox komandanın hücumunda rəngarənglik daha çoxdur. Bütün komandaların hücum xəttində daha çox oyunçuları var, nəinki müdafiəçilər.

– 2-ci yarıda daha effektli oynadınız. Bütün oyunu belə oynamaq üçün nə çatışmadı?
– Bu barədə çox danışmaq olar. “Qarabağ” icazə verdiyi zonalar var idi. Hansı ki, biz girə bilirdik. Çox yerdə qarşımızda sədlər var idi. Amma bu, alınan detallar, rəqibin yorğunçuluğu və ya bizim düzgün pressinqimizlə əlaqəli ola bilər. İlk hissə az alındı. Çünki “Qarabağ” daha rahat və hazırlıqlı idi.

– Matçın hakim idarəçiliyi ilə bağlı mövqeyiniz necədir?
– Hakimlərlə bağlı heç nə deyə bilmərəm. Onlar da gəncdir, öz üzərlərində işləyirlər. Heç kim də istəməz ki, meydanda səhv etsin. Biz də hərdən emosiyalara qapılırıq, yalandan nəsə deyirik. Stressimizi çıxartmaqdır, başqa bir şey deyil.