Qadınlardan ibarət 3x3 yığma komandamızın "Paris-2024" olimpiya təsnifat qruplarındakı rəqibləri müəyyənləşib.

Prosport.Az xəbər verir ki, 8 komandanın iştirak etdiyi ilk təsnifat oyunlarında yığmamız B qrupunda Niderland, Monqolustan və Çili komandaları ilə qarşılaşacaq. 12-14 apreldə Honkonqda keçiriləcək oyunlardan sonra qruplarda ilk 2 pilləni tutmuş komandalar təsnifat mərhələsinin yarımfinalına vəsiqə qazanacaq. Daha sonra yarımfinallarda qalib olmuş komandalar finala, finalda qələbə qazanmış kollektiv isə Olimpiadaya vəsiqə qazanacaq.

2-ci təsnifat oyunları isə 16-19 may tarixlərində Macarıstanın Debretsen şəhərində baş tutacaq. A qrupunda qərarlaşmış millimiz, Almaniya, Polşa və Tunis yığmaları ilə üz-üzə gələcək. 16 komandanın iştirak etdiyi 2-ci təsnifat mərhələsində qruplarda ilk 2 yeri tutmuş komandalar 1/4 finala vəsiqə qazanacaq. İlk təsnifat mərhələsindən fərqli, 2-ci təsnifat mərhələsində təsnifat turnirini ilk 3 sırada tamamlamış yığmalar Olimpiadaya vəsiqə qazanacaq.

Məlumat üçün bildirək ki, 8 komanda arasında keçiriləcək ilk təsnifat oyunlarında millimiz çempion olarsa, Olimpiadaya vəsiqəni təmin edəcək və artıq 2-ci təsnifat oyunlarında iştirak etməyəcək.