"Səbail"in baş məşqçisi Şahin Diniyev Premyer Liqanın XIX turunun "Zirə" ilə (0:0) matçından sonra mətbuat konfransında iştirak edib.

Prosport.Az xəbər verir ki, təcrübəli mütəxəssis komandasının bu görüşdəki çıxışını dəyərləndirib:

"Bu gün dinamik oyun var idi. Hər iki komanda həm hücumda, həm də müdafiədə taktiki cəhətdən savadlı oynamağa çalışırdı. Belə havada topa nəzarət etmək çətindir. 2-ci yarıda futbolçularım topu yerə salaraq, nəzarət etməyə çalışırdı. Futbolçularıma təşəkkür edirəm ki, bacardıqlarından da çoxunu etdilər. Meydanda komanda şəklində xarakter göstərə bildik. Fasilədən sonra ilk oyunumuz idi. Heç-heçə oyuna yaraşırdı.

Qollu heç-heçə olsaydı, daha yaxşı idi. Hər iki komanda 1 xal qazandı. Heç bir komanda itirmədi. Liderlərin oyunu idi. Heç bir komanda xal itirmək istəmirdi. Bu cür komandaların oyunları 6 xallıqdır. İtkilər qayıtmayıb. İlk dəfədir ki, 3-lü mərkəz müdafiəçisi ilə oynayırdıq. Bu da futbolçularımızın olmaması ilə bağlıdır. Yeni transferlər dünən gəlib. Təəssüf ki, Antalya toplanışında bizimlə olmayıblar. Məncə, bu gün sistemimiz işlədi. Qarşıdakı oyunlarda daha yaxşı olmağa çalışacağıq. Hər bir xal bizə kömək edəcək".