Premyer Liqada qış fasiləsindən sonra ilk oyununu sabah “Qarabağ”a qarşı keçirəcək “Araz-Naxçıvan” oyunöncəsi son məşqinə çıxıb.

Prosport.Az xəbər verir ki, “Azərsun Arena”nın ehtiyat meydanında 1 saata qədər davam edən hazırlıq prosesində futbolçular bir neçə taktiki planda tapşırıqları icra edib.

Zədəli futbolçulardan Orxan Əliyev kollektivlə çalışmalara qoşulubsa, digər zədəli İsmail Azzaui hələ də həkim nəzarəti altında müalicəsini davam etdirir. Onun “Qarabağ”a qarşı oynamayacağı dəqiqdir. İsmaildən başqa, Vanderson da sabahkı matçda meydana çıxmayacaq. Buna səbəb braziliyalı yarımmüdafiəçinin sarı vərəqə limitini dolduraraq cəzalı duruma düşməsidir.

Qarşı tərəfdə isə Marko Yankoviç əlindən zədə aldığından, matçı buraxacaq.

Qeyd edək ki, “Qarabağ” – “Araz-Naxçıvan” oyunu sabah saat 19:00-da Tofiq Bəhramov adına Respublika stadionunda keçiriləcək.