"Bərabər səviyyəli oyun izlədik. Həm "Sabah", həm də biz qalib gələ bilərdik. Bu dəfə bəxt "Sabah"ın tərəfində idi".

Prosport.Az xəbər verir ki, bunu "NTD-İndiqo" basketbol klubunun baş məşqçisi Tahir Baxşıyev Azərbaycan çempionatının "Sabah"la (79:83) qarşılaşmasından sonra oyunla bağlı fikirlərini bildirərkən deyib.

Kişi basketbol millimizin də baş məşqçisi olan Tahir Baxşıyev "Sabah"a qarşı yaxşı oynadıqlarını bildirib: "Oyuna böyük itkilərlə çıxmışdıq. Elşad Şirzadov və Cared Smol oynamırdı. Onlar bizim üçün çox vacibdir. Bu gün meydançaya cəmi 7 oyunçumuz çıxmışdı. "Sabah"da bu cəhətdən vəziyyət daha yaxşıdır. Ümumiyyətlə, düşünürəm ki, uşaqlar yaxşı oynadı. Bu qədər top itkisinə yol verməsəydik, oyun başqa cür başa çatacaqdı. Uşaqlara fədakarlıqlarına görə təşəkkür edirəm. Kişi kimi oynadılar. 4-cü periodda 5 qayda pozuntusundan sonra meydanı tərk edən Qriffn Remi olmadan da pis oynamadıq. Cəmi 1 xal fərqlə uduzduq – 13:14. Remi bizim üçün çox vacib oyunçudur. Və matçın sonlarında bizə çox kömək edərdi. Ancaq "Sabah" kimi güclü rəqibə qarşı onsuz da oynaya bildik və komanda sınmadı. Əsas odur ki, növbəti matçlarda tam heyətlə oynayaq".