"İlk öncə 20 yanvar gününə görə Azərbaycan xalqına başsağlığı verirəm. Oyuna gəlincə, ilk hissə yaxşı alındı. Hər iki komanda hücum edirdi, hər iki tərəf qol vura bilərdi. 2-ci yarıda dinamika çox deyildi, sürət aşağı oldu. Hər iki komanda qalib gəlmək istəyirdi. Məncə, stadiona gələn azarkeşlər oyundan razı qaldı".

Prosport.Az xəbər verir ki, bu sözləri "Sabah"ın baş məşqçisi Murad Musayev deyib. O, Premyer Liqanın XlX turunun "Neftçi" ilə (0:0) görüşündən sonra keçirilmiş mətbuat konfransında deyib.

– Ayaz Quliyev Aleksey İsayevin boşluğunu doldura bildi?
– Ayaz yaxşı oyun keçirdi. İnanırıq ki, o bunun öhdəsindən gələcək. Amma suala cavab vermək üçün müəyyən müddətə ehtiyac var. 

– İsayevin gedişinə görə oyun planında nəsə dəyişiklik edəcəksiniz?
– Xeyr. Bir oyunçuya görə oyun planımızı dəyişmək fikrimiz yoxdur. 

– Yeni transfer gözlənilir?
– Hələ ki yox. Heç kimlə danışıqlar aparmırıq. 

– Miodraq Bojoviçi Rusiyadan yaxşı tanıyırsınız. Ona Rusiyada həmişə qalib gəlmişdiniz, bu gün də uduzmadınız. Bunun hansısa resepti var?
– Önəmli olan bu gün baş verən hadisələrdir. Hansısa müqayisə aparmaq doğru olmaz. Rusiyada çalışarkən mənim komandam ("Krasnodar"ı nəzərdə tutur – red.) Bojoviçin komandasından daha yaxşı idi, imkanlar daha geniş idi. Amma hazırda eyni gücə malik komandalardayıq. Düzü, ona qarşı neçə dəfə oynadığımı xatırlamıram.

– "Sabah"da işləməyə başladığınız komanda ilə hazırkı arasında fərq yüksəkdir?
– Futbolda bu hallar normaldır. Gələnlər də, gedənlər də olur. Müqayisə etmək düzgün deyil. Hər dəfə yenilənmə olur. Avrokuboklarda Coy-Lans Mikels olmadan da necə oyunlar oynamışdıq. Əlimizdə olan heyətlə istədiyimiz nəticələri qazanmağa çalışmalıyıq. Hansısa müqayisə aparmaq doğru deyil.

– Son dəqiqələrdə hücum xəttində dəyişikliklər etdiniz. Qələbə qazanmaq üçün etdiniz, yoxsa məcburiyyətdən irəli gəlirdi?
– Qalib gəlmək istəyirdik. Ona görə də dəyişikliklər etdik. Bizim hücum mövqeyində oynayan yaxşı futbolçularımız var. Bəlkə də həmin futbolçuları daha əvvəldən meydana buraxmaq olardı.

– Oyunlar zamanı sizi emosional görməyə alışmışıq, amma bu gün daha çox təmkinliydiniz. Hakimlik haqda da çox danışmadınız...
– Xüsusi danışmağa nəsə yoxdur. Hakim bu gün çox da görünmədi.  O, sərt oyuna icazə verirdi. Mənim belə olanda, xoşum gəlir. Sərt mübarizələrə oynamaq imkanı verən hakim haqda nəsə demək olmur. Çalışacağam ki, hər zaman təmkinli və sakit olum.