"İlk növbədə Azərbaycan xalqına 34 ildən əvvəl baş verən hadisələrə görə bağlı başsağlığı verirəm. Oyuna gəlincə, məncə, biz pis oynamadıq. Oyuna yaxşı başladıq, ilk yarıda qol vurmaq üçün imkanlarımız var idi. “Sabah” da qol epizodları yarada bildi. 2-ci yarı da dinamik və maraqlı keçdi. Hər iki komandanın qol imkanı var idi. Məncə, bərabərlik ən ədalətli nəticə oldu".
Prosport.Az xəbər verir ki, bu sözləri "Neftçi"nin baş məşqçisi Miodraq Bojoviç deyib. O, Premyer Liqanın XlX turunun "Sabah"la (0:0) görüşündən sonra keçirilmiş mətbuat konfransında iştirak edib. Monteneqrolu mütəxəssis jurnalistlərin suallarını cavablandırarkən klubun rəsmi şəkildə açıqlamadığı kolumbiyalı hücumçu Brayan Moreno ilə müqavilə bağladıqlarını təsdiqləyib.
– Əlinizdəki material hədəfə çatmaq üçün yetərlidir?
– Biz 2 yeni oyunçu ilə – Alfa Konte və Brayan Moreno ilə müqavilə imzalamışıq. Onlar bizimlədir. Heyətdə 2 zədəlimiz var (Azər Əliyevlə Kilan Lebonu nəzərdə tutur – red.). İndiki heyətdə olan oyunçular yetərli olacaq.
– Deyirdiniz ki, fiziki hazırlıq sarıdan problemlər var. Bu problemi aradan qaldıra bildiniz?
– Bu elə də asan həll olunan məsələ deyil. Daha çox vaxt lazım olacaq. Amma komanda ən azından mübariz şəkildə irəliləsə, əvvəlkindən daha yaxşı olacaq. Bu gün meydanda biganə qalan hansısa oyunçunu görmədim. Nəticə onlar üçün önəmli idi.
– Hücumda bitiriciliyi olan forvard hələ də çatışmır. Yeni transferiniz Brayan Moreno da bir müddətdir ki, zədəlidir. Yeni hücumçu gələcək?
– Moreno sağ-salamatdır. Ümid edirik ki, tez bir zamanda oynamağa başlayacaq.
– Murad Musayevlə Rusiyada bir neçə dəfə fərqli komandaların baş məşqçisi kimi qarşılaşmısınız və heç birində qalib gələ bilməmisiniz. Bu gün də qələbə qazanmaq mümkün olmadı...
– Muradın Rusiyada çalışdırdığı komanda ən yaxşılardan biri idi. Burada elə deyil. Əlbəttə ki, zarafat edirəm. Murad Musayevə hörmətim var, çox gözəl məşqçidir.
– Matçdan sonra Ayaz Quliyevlə nə haqda danışdınız?
– "Arsenal"da 1 il mənimlə çalışıb. Onunla münasibətimiz yaxşıdır. Salamlaşdıq, bir-birimizi təbrik etdik.