Azərbaycan Basketbol Liqasının XI turunda "Sumqayıt"ı 100:90 hesabı ilə məğlub edən "Xırdalan" komandasının baş məşqçisi Uğur Özdəmir matç haqqında fikirlərini bölüşüb.
Prosport.Az onun və bu oyunla bağlı digər fikirləri təqdim edir:
Uğur Özdəmir ("Xırdalan"ın baş məşqçisi): "Bizim üçün kritik bir görüş idi. Çünki pley-off oğrunda mübarizədə əsas rəqiblərimizdən biri ilə qarşılaşırdıq. Matça yaxşı hazırlaşdığımızı düşünürəm. Amma bəzi məqamda oyunçularım lazımi performansı göstərə bilmədi. Biz hücumda öz oyunumuzu oynadıq, lakin müdafiə barəsində eyni sözləri deyə bilmərəm. Rəqibin heyətində 2 nömrəli basketbolçu Leonar Dikson çox gözəl oyun sərgilədi. Bu, oyunda bizi bir az narahat edən məqam idi. Əlavə olaraq gedişatda 20 xallıq fərqin gətirdiyi rahatlıq da öz sözünü dedi. Rəqib bu məqamdan yaxşı istifadə edə bildi. Əks halda sonda hesab fərqi daha böyük ola bilərdi.
Bütün oyunçularıma güvənirəm. Nəcəf Babayevə ötən oyunda da startda şans vermişdim. Bu dəfə də ona güvəndim və o bu etimadı doğrultdu. Açığı, Nəcəfdən çox ekstra bir performans idi. Amma nə yalan deyim, gözləyirdim. Belə davam etsə, parket üzərində olduğu dəqiqələri də avtomatik artmış olacaq. Çünki qarşıda bizi kubok oyunları da gözləyir. Orada daha çox yerli basketbolçulara ehtiyac olacaq. Babayevin belə oyunu buna görə də məni çox sevindirir. Ona təşəkkür edirəm".
Nəcəf Babayev ("Xırdalan"ın basketbolçusu): "Oyun çox gərgin və yüksək tempdə keçdi. Rəqib yaxşı oyun gösdərdi. Biz də komanda oyunu nümayiş etdirdik. Göstərdiyimiz oyun və qazandığımız nəticə gərgin məşqlərin bəhrəsidir. Komandamın qələbəsində pay sahibi olduğum üçün çox şadam".
Teymur Hüseynov ("Sumqayıt"ın baş məşqçisi): "Oyunla bağlı nə deyə bilərəm ki?! Mudafiədə bərbad təsir bağışladıq. Xüsusən də rəqibin 21 xal toplayan yerli oyunçusunu bağlaya bilmədik. Oyunçularıma deyirəm ki, rəqibin yaxşı çıxış edən basketbolçusuna qarşı sərt oynayın, yeri gələndə fol edin, amma... Demək olar ki, oyunumuz alınmadı. Doğrudur, 3-cü periodda hesab arasındakı fərqi xeyli əritdik, amma sonra yenə də "3-lük"lər səbətimizə "töküldü". Yerli oyunçularımız da imkanlarından aşağı səviyyədə çıxış etdi. Rendallın oyununu bəyəndim, Smitlə Dikson da yaxşı idi. Növbəti oyunlarda nəyi dəyişək? Nəyi dəyişə bilərik ki. Sürətli əks-hücuma çıxmağı məşq edirik. İlk hissədə demək olar ki, qaçmadıq. Bunu bacarsaydıq, nəsə edə bilərdik".