Azərbaycanda 2 voleybol klubu Yüksək Liqada iştirakdan imtina etməli olub.

Prosport.Az-ın xəbərinə görə, kişilər üzrə Azərbaycan çempionatında çıxış edən "Xarı Bülbül Şuşa" və "Xarı Bülbül Laçın" komandaları rəsmən buraxılıb.

Bu barədə hər iki klubun təsisçisi olan İlqar İmamquliyev və "Xarı Bülbül Şuşa"nın baş məşqçisi olan Ziya Rəcəbov sosial şəbəkə hesablarından paylaşım edib.

Qeyd edək ki, hər iki klub sponsorsuzluq ucbatından buraxılmağa və Yüksək Liqada mübarizəni dayandırmağa məhkum olub. Cari mövsüm Azərbaycanı avrokuboklarda təmsil etmiş yeganə kişi komandamız olan "Xarı Bülbül Şuşa" bunadək çempionatda 5 qələbə qazanmış və 16 xalla liderlər sırasında qərarlaşmışdı. Bu 2 klubun buraxılması ilə çempionatda komandaların sayı 4-ə endi. İndi Azərbaycan Voleybol Federasiyasının bu 2 komandanın qarşıdakı oyunları ilə bağlı nəticələrə dair qərarı maraqla gözlənilir.